Haapii i te parau mau

Mai te avaˈe Tetepa, e piahia i roto i te Faaineineraa no te putuputuraa Oraraa e taviniraa Kerisetiano hoê hiˈoraa apî i raro aˈe i te upoo parau “Haapii i te parau mau.” Ta tatou fa, o te faaiteraa ïa te hoê parau mau Bibilia tumu i te taata, ma te faaohipa i te hoê uiraa e irava.

Ia ite tatou e te anaanatae ra te taata, e nehenehe tatou e vaiiho ˈtu i te hoê papai aore ra e faaite atu i te hoê video o te jw.org a parau atoa atu ai e e hoˈi faahou mai tatou e farerei ia ˈna. E tia ia tamata tatou i te hoˈi faahou e farerei i te taata tau mahana i muri aˈe no te aparau â no nia i to na mua ˈtu tumu parau. Ua niuhia te mau hiˈoraa apî i nia i te mau haapotoraa o te mau pene o te buka Eaha ta te Bibilia e nehenehe e haapii mai? (reo Beretane) I roto i teie buka, te vai ra hau atu â uiraa e irava o te tauturu ia tatou no te mau farerei-faahou-raa aore ra no te faatere i te hoê haapiiraa ma te faaohipa i te Bibilia anaˈe.

Hoê anaˈe eˈa o te aratai i te ora. (Mt 7:13, 14) I te mea hoi e e paraparau tatou i te mau taata no roto mai ratou i te mau haapaoraa e rave rau aore ra mea taa ê to ratou huru oraraa, mea tia ia faaite tatou i te tahi mau parau mau Bibilia o te huti i te ara-maite-raa o te taata taitahi. (Ti1 2:4) A rahi noa ˈtu â ˈi to tatou ite no nia i te mau tumu parau Bibilia e rave rau e a aravihi noa ˈtu â ˈi tatou no te “tufa i te parau mau ra,” e rahi atu â to tatou oaoa e e manuïa tatou i te haapiiraa i te parau mau ia vetahi ê.—Ti2 2:15.