Te mau haruharuraa—E nafea ia faaohipa i te reira
1. Hau atu i te mau papai, eaha atoa ta tatou e fanaˈo nei?
1 E rave rahi taata te oaoa nei i te faaohipa i te jw.org no te taio i te parau mau au maitai e te tano. (Koh. 12:10) Ua faaohipa anei râ oe i te mau haruharuraa? E nehenehe oe e faaroo i te mau haruharuraa o te tahi mau papai i nia i ta tatou reni Internet. E nafea tatou e faufaahia ˈi i te reira?
2. E nafea ia faaohipa i te mau haruharuraa i ta tatou iho haapiiraa aore ra haamoriraa utuafare?
2 I ta tatou iho haapiiraa aore ra haamoriraa utuafare: E faaohipa maitai aˈe tatou i to tatou taime ma te faaroo i te mau haruharuraa o te mau papai a ratere ai aore ra a rave ai tatou i te mau ohipa o te mau mahana atoa. (Eph. 5:15, 16) E nehenehe tatou e tauiui rii i ta tatou e rave ra i te haamoriraa utuafare ma te faaroo i te mau haruharuraa e ma te pee i te taioraa i roto i ta tatou iho papai. Ia faaohipa tatou i te mau haruharuraa i roto i ta tatou iho haapiiraa, e nehenehe tatou e aravihi atu â i roto i ta tatou taioraa aore ra i roto i te haapiiraa i te tahi reo.
3. I roto i ta tatou tuhaa fenua, o vai te faufaahia i te mau haruharuraa?
3 I roto i te taviniraa: Te manaˈo ra te tahi mau taata o ta tatou tuhaa fenua e aita e taime to ratou no te taio i te tahi papai. E farii râ paha ratou i te faaroo i te mau haruharuraa. E nehenehe atoa tatou e farerei i te tahi taata e reo ê to ˈna e o te farii i te poroi o te Basileia mai te peu e e horoahia te reira na roto i to ˈna “iho reo.” (Ohi. 2:6-8) I roto i te tahi mau taˈere, e tuhaa faufaa te haapiiraa ma te faaroo noa. Ei hiˈoraa, i roto i te taˈere Hmong, ua matau te taata i te faatia i ta ratou mau peu tumu i te uˈi apî aˈe. E tamau aau maitai teie mau taata apî aˈe i ta ratou e faaroo ra. I roto e rave rahi taˈere Afirika, mea au na te taata ia haapii maoti te faatiaraa aamu.
4. Eaha ta tatou e ui ia tatou iho no te tauturu i te mau taata o ta tatou tuhaa fenua?
4 I roto i te tuhaa fenua, e faufaahia anei te taata ia patahia te tahi haruharuraa na roto i to ˈna iho reo? E faufaahia anei te tahi atu taata ia hapono atu tatou i te hoê haruharuraa na roto i te hoê e-mail? E nehenehe anei tatou e tuu i te hoê papai haruharuhia i nia i te hoê CD e e horoa ˈtu i te taata tei anaanatae? E nehenehe atoa anei tatou e horoa i te reira e te papai piahia? Ia hapono tatou i te taatoaraa o te hoê buka, buka rairai, vea aore ra api parau na roto i te hoê e-mail, e tapao tatou i te reira i nia i ta tatou tapura taviniraa. Ua haruharuhia te mau papai ia nehenehe tatou e faaohipa i te reira i roto i ta tatou iho haapiiraa e no te tanu i te mau huero o te parau mau o te Basileia.—Kor. 1, 3:6.