Ia aravihi atu â i roto i te taviniraa—Te pûpûraa i te buka Bibilia haapii

No te aha e mea faufaa ˈi? E mauhaa faufaa te buka Bibilia haapii no te haapii ia vetahi ê. Teie râ, hou a faaohipa ˈi i te reira no te faatere i te hoê haapiiraa e te tahi taata, e mea tia ia pûpû i teie buka ia ˈna. E mea faufaa ïa ia tutava tatou i te aravihi atu â i roto i te pûpûraa i te buka Bibilia haapii. (Mas. 22:29) E rave rau ravea no te na reira, na te taata poro taitahi râ e maiti i te mea tano no ˈna.

Nafea ïa?

A tuu i te hoê uiraa anaanatae mau no te aratai i te taata i te hoê pene o te buka. E nehenehe atoa oe e maiti hoê o te mau uiraa i te omuaraa o te pene taitahi. A faaroo i te pahonoraa a te taata e a taio i te hoê irava tano. I muri iho, a faaite ia ˈna i te paratarafa e tuati ra i teie tumu parau e e tauaparau poto paha orua i nia i te reira.
E nehenehe atoa oe e faaohipa i te mau api matamua o te buka no te huti i te ara-maite-raa o te taata. I muri iho, a faaite ia ˈna ihea e itehia ˈi te pahonoraa a te Bibilia i roto i te buka. Ei hiˈoraa, a faahiti i te hoê ati tei tupu noa ˈˈe e tei itehia i roto i te mau parau apî. A faataa ˈtu e mea rahi te taata tei hinaaro e ite i te pahonoraa a te mau uiraa i te api 3. Aore ra e nehenehe oe e parau e te farerei poto nei oe i te taata no te faaite atu i te hoê manaˈo oaoa no te a muri aˈe. I muri iho, a faaite ia ˈna i te mau hohoˈa o te mau api 4-5 e a ui: “Teihea mau parau fafau ta oe e hinaaro e ite ia tupu?” Teie te tahi atu ravea: e nehenehe oe e faaite e te farerei poto nei oe i te taata no te tauturu atu ia ite i te pahonoraa i te mau uiraa faufaa roa o te oraraa. I muri iho, a faaite atu i te mau uiraa i raro i te api 6 e a ani eaha te uiraa ta ˈna e anaanatae roa ˈˈe.
A ani roa ˈtu i te taata e hinaaro anei o ˈna e haapii i te Bibilia. E nehenehe oe e parau: “Te faaite nei matou i teie buka haapiiraa Bibilia i te mau taata. Ua ite ê na anei oe i te reira? [A vaiiho ia ˈna ia pahono.] Mai te peu e e tau minuti ta oe, te hinaaro nei au e faaite ia oe e nafea ia faaohipa i teie buka e ta oe iho Bibilia.”

Ta oe e rave i teie avaˈe:

A faaineine ia oe i te haamoriraa utuafare.
I roto i te taviniraa, a faaite i te tahi atu mau taata poro eaha ta oe e parau i te taata. (Mas. 27:17) A taui i ta oe faaiteraa mai te peu e aita e tano ra.