Ia aravihi atu â i roto i te taviniraa—A faaineine i te taata poro apî

No te aha e mea faufaa ˈi? E mea tia i te mau pǐpǐ apî a Iesu ia haapao i te “mau mea atoa” ta ˈna i faaue atu, mai te faaueraa ia haapii i te parau mau ia vetahi ê. (Mat. 28:19, 20) E rave rahi tei riro ei piahi i te Haapiiraa no te taviniraa Kerisetiano e tei haamata ê na paha i te poro ma te faanaho-ore-hia i to ratou mau fetii aore ra hoa. Tera râ, a rahi atu â ˈi to ratou mauruuru no ta ratou i haapii e a ite ai e te hinaaro ra Iehova ia faaitehia te parau apî oaoa i te mau taata atoa, e hinaaro paha ratou e apiti i roto i te ohipa pororaa. (Roma 10:13, 14) Mea faufaa ia faaineine maitai i te feia tei riro noa ˈtura ei taata poro bapetizo-ore-hia ia nehenehe ratou e aravihi atu â i roto i te pororaa e e haere i mua i te pae varua.—Luka 6:40.

E nafea ïa?

A tauturu i te taata poro apî ia rave i te mau papai e hinaarohia i roto i te pororaa aore ra haapiiraa. A faaite atu e nafea oe e faanaho ai i ta oe pute no te pororaa e a faataa eaha te faufaaraa o te papai taitahi ta oe e rave.
A maiti e te taata poro apî i te tahi hohoˈa faaiteraa o Ta tatou taviniraa i te Basileia e a rave i te hoê faahiˈoraa. A faaitoito i te taata poro apî ia faahiti i te reira na roto i ta ˈna iho mau parau. A faaineine ia ˈna ma te faaohipa i te mau tupuraa matauhia i roto i te tuhaa fenua maoti te api 82 o te buka École du ministère. A faaite atu e mea faufaa ia maiti i te hoê huru faaahuraa e faaneheneheraa e tano.—Kor. 2, 6:3, 4.
A faaineine mǎrû noa ia ˈna. A faaite i te taata poro apî i te hohoˈa o te tuhaa fenua e a haapii atu e nafea ia faaohipa i te tapaopaoraa na te mau fare. A faaite eaha te tapaopaohia e anaanatae anaˈe te tahi taata. A haapii atu e nafea ia faaohipa i te jw.org i roto i te pororaa e te buka iti Une bonne nouvelle pour des gens de toutes nations. A tauturu ia ˈna ia ite eaha te rave ia anaanatae noa te taata.—Kor. 1, 3:6.
A faaoromai e a haapopou atoa ia ˈna. (Mas. 25:11) A faaite i te hiˈoraa maitai. E ohipa maitai to oe itoito rahi e te tauturu ta oe e horoa ˈtu i nia ia ˈna.

Ta oe e rave i teie avaˈe:

A poro i tera e tera fare e ta oe piahi Bibilia. A rave i te tahi farerei-faahou-raa aore ra a faatere i te tahi haapiiraa Bibilia e o ˈna. Aita anaˈe ta oe e piahi Bibilia, a ani i te tahi taata poro aita i aravihi roa ia apiti ia oe.