Te mau mauhaa no te haapii ia vetahi ê
1. No te aha e nehenehe ai e faaau te feia poro i te taata rimaî?
1 E rave rahi mauhaa ta te taata rimaî e faaohipa. Te vai ra te tahi mau mauhaa no te tahi ohipa taa ê. Eita ïa te reira e faaohipa-rahi-hia. Tera râ, te vai ra te mau mauhaa o te faaohipa-pinepine-hia. Pauroa te mau rimaî aravihi e tuu i tera mau mauhaa i roto i ta ratou pute. Tera hoi ta ratou e faaohipa rahi roa ˈˈe ma te aravihi. Te faaitoito nei te Bibilia i te Kerisetiano taitahi ia tutava i te rave maitai i ta ˈna taviniraa e ia riro “ei rave ohipa aita e haamaraa.” (Tim. 2, 2:15) Eaha te mauhaa faufaa roa ˈˈe i roto i ta tatou pute? Te Parau a te Atua, te mauhaa matamua ta tatou e faaohipa no te ‘faariro i te taata ei pǐpǐ.’ (Mat. 28:19, 20) No reira, e mea tia ia tutava i te faaohipa i te Bibilia ma te aravihi. Tera râ, te vai ra te tahi atu mau mauhaa faaohipa-pinepine-hia no te haapii i te parau mau ia vetahi ê. E mea tia ïa ia ite te mau Kerisetiano atoa ia faaohipa i te reira ma te aravihi.—Mas. 22:29.
2. Eaha ta tatou mau mauhaa matamua no te haapii ia vetahi ê?
2 Ta tatou mau mauhaa matamua no te haapii ia vetahi ê: Hau atu i te Bibilia, eaha te tahi atu mau mauhaa ta tatou e nehenehe e faaohipa? Te mauhaa matamua no te haapii i te parau mau Bibilia ia vetahi ê, oia hoi te buka Eaha ta te Bibilia e haapii mau ra? Ia oti te haapiiraa i nia i teie buka, e faaohipa tatou i te papai “Ia vai maite outou i roto i te here o te Atua.” E haapii atu ïa tatou e nafea ia faaohipa i te mau aratairaa Bibilia i te mau mahana atoa. No reira, e mea tia ia aravihi tatou i te faaohiparaa i tera na buka. E nehenehe atoa tatou e faaohipa i te tahi mau buka rairai. Te mauhaa matamua ta tatou e rave no te haamata i te haapiiraa Bibilia, oia hoi te buka rairai Parau apî oaoa a te Atua. I te tahi taime, i roto i te tuhaa fenua, e farerei tatou i te feia o te ore e ite maitai i te taio. Oia atoa i te feia e paraparau ra i te hoê reo aita e rave rahi papai aore ra aita roa ˈtu e papai na roto i tera reo. A faaohipa ïa i te buka rairai Faaroo i te Atua aore ra Faaroo i te Atua no te ora e a muri noa ˈtu. No te aratai i te piahi Bibilia i te faanahonahoraa, te vai ra te buka rairai O vai te rave nei i to Iehova hinaaro i teie mahana? No te tauturu i te taata ia riro ei pǐpǐ, mea au roa te mau video No te aha e haapii ai i te Bibilia?, Eaha te ravehia i te Piha a te Basileia? e E iˈoa anei to te Atua? E tia iho â ïa ia haapii e nafea ia faaohipa maitai i teie mau mauhaa.
3. Eaha ta te mau tumu parau o Ta tatou taviniraa i te Basileia i mua nei e haapii mai ia rave?
3 I roto i te mau tumu parau o Ta tatou taviniraa i te Basileia i mua nei, e tauturuhia tatou ia aravihi atu â i te faaohiparaa i te tahi mau papai no te haapii ia vetahi ê. A tutava ˈi i te faaohipa i tera mau mauhaa ma te tano, e pee maite tatou i teie aˈoraa faaurua: “E ara ia oe, e ta oe e haapii ra; e tamau maite â i te reira: tei te na reira hoi e ora ˈi oe e te feia atoa e faaroo mai ia oe ra.”—Tim. 1, 4:16.