A tauturu i te taata matapo ia ite o vai Iehova

1. Mea nafea Iesu i te faaiteraa i te aroha no te taata matapo?

¹ Tau mahana e toe ra hou a pohe ai Iesu. A faarue ai o ˈna ia Ieriko, tuô aˈera e piti taata taparu matapo: “E te Fatu, . . . e aroha mai ia mâua.” Noa ˈtu e e tupuraa fifi mau te tiai ra ia Iesu, ua pii aˈera o ˈna i teie na taata e ua faaora ia raua. (Mat. 20:29-34) E nafea e pee ai i te aroha o Iesu no te taata matapo?

2. E nafea e poro ai i te hoê taata matapo ta tatou e farerei i te vahi taata?

² A tauturu atu: A farerei ai i te hoê taata matapo, peneiaˈe i te vahi taata, a faaite atu o vai oe e a pûpû atu maa tauturu. Eita paha o ˈna e tiaturi ia oe i te omuaraa aˈunei e manaˈo ino to oe. A faaite atu râ i te huru auhoa e a anaanatae mau ia ˈna. E tiaturi mai ïa o ˈna. A haamanaˈo atoa e ua rau te faito mataporaa, e ite ïa oe eaha te tauturu ta ˈna e hinaaro. I muri iho, e nehenehe oe e faahiti e te apiti nei oe i te hoê ohipa haapiiraa Bibilia. A ani ia ˈna e e nehenehe anei ta oe e taio atu i te hoê irava mai te Salamo 146:8 aore ra Isaia 35:5, 6. Ia ite o ˈna i te taio i te Braille, a ani atu e aita anei o ˈna e hinaaro i te hoê papai Braille o te tauturu ia ˈna ia ite atu â no nia i te Bibilia. A tauturu atoa ˈtu paha ia ˈna ia fanaˈo i te mau haruharuraa i nia jw.org. E roro uira anaˈe ta ˈna o te fanaˈo i te hoê porotarama o te taio ma te reo puai i te mea e vai ra i nia i te paruai o te roro uira, e au paha o ˈna i te mau papai piahia i nia jw.org. Oia atoa te mau papai te nehenehe e rave mai i te faito RTF (Rich Text Format) no te feia matapo.—A hiˈo i te tumu parau tarenihia “A tauturu ai i te taata matapo . . .”

3. E nafea e imi ai i te taata matapo i roto i ta tatou tuhaa fenua?

³ A imi i te taata matapo: Mea varavara tatou i te farerei i te taata matapo a poro ai i tera e tera fare. Aita hoi te rahiraa e au i te paraparau i te taata ta ratou i ore i matau o te haere i to ratou fare. E titauhia ïa te tutavaraa rahi no te “ui,” aore ra imi, i taua mau taata ra no te poro ia ratou. (Mat. 10:11) E hoa ohipa aore ra hoa haapiiraa matapo anei to oe? A haere e paraparau ia ˈna. E fare haapiiraa no te feia matapo anei i roto i ta outou tuhaa fenua? A pûpû atu ïa i te tahi o ta tatou mau papai Braille no ta ratou vairaa buka. Ua matau anei oe i te feia e taata matapo hoê o to ratou fetii? E taatiraa anei to roto i ta outou tuhaa fenua o te tauturu nei i te taata matapo aore ra i te hoê fare o te haapao atoa ra i te taata matapo? A faataa i te melo o te utuafare, i te taata farii aore ra i te tia faatere e te hinaaro mau nei te mau Ite no Iehova e tauturu i te feia matapo. A faataa ˈtu e te pûpû nei tatou i te mau papai Braille e te mau haruharuraa. A faaite atoa ˈtu i te parau fafau Bibilia e ua fatata roa te Atua i te faaore roa i te maˈi matapo. A faaite atoa ˈtu paha i te video ravehia mai i nia jw.org “Sans elle, je serais perdu” no nia i te hoê taata matapo o tei oaoa mau i te fanaˈo i te Bibilia na roto i te papai Braille. Ma te faataa i te tumu o to oe tere, e faaite mai paha ratou e nafea oe e nehenehe ai e farerei i te taata matapo.

4. Eaha te mau haapiiraa e huti mai i te hiˈoraa o Janet?

⁴ Ua haere te hoê tuahine matapo o Janet te iˈoa i te hoê fare e farii atoa ra i te feia matapo. Ua paraparau o ˈna e hoê vahine apî matapo. Ua parau Janet ia ˈna: “Ua faaora Iesu i te feia matapo no te faaite i ta ˈna e rave no te taatoaraa o te feia matapo.” Ua hiˈopoa raua i te Apokalupo 21:3, 4 e ua faataa Janet e nafea teie parau fafau e tupu ai maoti te Basileia o te Atua. Mamû aˈera te vahine e parau aˈera o ˈna: “A tahi ra vau e faaroo ai i te reira i te vaha o te hoê taata matapo. Te tiaturi nei te rahiraa o te taata e ite nei e e roohia vetahi ê i te maˈi matapo no te hoê ohipa ta ratou aore ra ta to ratou tupuna i rave.” Ua hapono atu Janet i te hoê poroi roro uira i tera vahine. E pata noa ïa o ˈna i nia iho no te fanaˈo i te buka Bibilia haapii. I teie nei, te haapii nei raua i te Bibilia e piti taime i te hebedoma.

5. Eaha te haamaitairaa ia faaite tatou i te aroha no te taata matapo?

⁵ Eita iho â ïa tatou e nehenehe e faaora i te maˈi matapo mai ia Iesu. E nehenehe râ tatou e tauturu i te feia matapo, oia atoa i te feia ua haapourihia to ratou huru feruriraa e te atua o teie nei ao, ia taa i te parau mau o te Parau a te Atua. (Kor. 2, 4:4) Ua faaora Iesu i te maˈi o na taata matapo e piti i pihai iho ia Ieriko no to ˈna “aroha” ia raua. (Mat. 20:34) E faaite atoa anaˈe i te hoê â aroha no te taata matapo. E oaoa ïa tatou i te tauturu i te hoê o ratou ia haapii o vai Iehova, te Atua o te faaore roa i te maˈi matapo.