Te mau himene apî no te arue i te Atua!
1 I te 4 no Atopa 2014, ua tupu te rururaa matahiti a te Watchtower and Tract Society of Pennsylvania. I reira i faaitehia ˈi e e faaapîhia ta tatou buka himene. E parau apî faahiahia tera! Ua haamanaˈohia te taatoaraa i te faufaaraa o ta tatou mau himene o te Basileia i roto i te haamoriraa.—Sal. 96:2.
2 E ui paha oe, ‘No te aha e mea tano ia faaapî i te buka himene?’ Mea rahi te tumu. Na mua roa, e faatano-noa-hia to tatou maramaramaraa i te Bibilia. Mea hinaarohia ïa ia faatano atoa i ta tatou mau himene. (Mas. 4:18) Teie te tahi atu tumu: E rave rahi mau taˈo e pereota i roto i te buka himene ta tatou e faaohipa nei tei niuhia i nia i te neneiraa tahito o te New World Translation. E mea tia ia faatano i tera mau himene no te faatuea i te huru papairaa o te neneiraa faaapîhia. I te mea e e ohipa rahi tei titauhia no te faatano i te mau himene atoa, ua opuahia ïa ia tuu tau himene apî noa i roto i te buka himene.
3 E tiai anei tatou ia piahia hoê buka himene apî no te faaohipa i te mau himene apî? Eita. E oaoa matou i te faaite atu e i te mau avaˈe i mua, e tuuhia e rave rahi himene apî i nia i ta tatou reni Internet, jw.org. Ia matara mai hoê, e itehia te parau “himene apî” i nia i te porotarama no te putuputuraa no te taviniraa. E himenehia te reira i te hopea o te putuputuraa.
4 Nafea ia haapii i te mau himene apî: E mea fifi paha ia haapii i te hoê himene apî. Mai te fatu salamo, e hinaaro iho â tatou e himene ma te reo puai i ta tatou mau putuputuraa, eiaha râ e “mamû.” (Sal. 30:12) No te haapii i te hoê himene apî, a pee i to muri nei mau aratairaa ohie ia faaohipa:
A faaroo e rave rahi taime i te upaupa o te himene te matara mai i nia i ta tatou reni Internet. Ia faaroo rahi atu â oe i te upaupa, e haamanaˈo ohie atu â oe i te himene.
A haapii i te himene apî e a tamata i te tamau i te reira.
A himene e te upaupa tae roa ˈtu i te taime e ite oe i te reira.
I ta oe haamoriraa utuafare, a himene e rave rahi taime i te mau himene apî tae roa ˈtu i te taime e ite to oe utuafare i te reira.
5 I te mau avaˈe i mua, ia faanahohia hoê himene apî i te hopea o te putuputuraa no te taviniraa, e patahia te upaupa hoê taime ia faaroo te taatoaraa i te reira. I muri iho, e himene ratou e te upaupa, mai te ravehia no te tahi atu mau himene.
6 A feruri ai no nia i te reira, e riro te himeneraa i ta tatou mau putuputuraa ei oaoaraa. E apiti hoi tatou i to tatou reo no te arue ia Iehova. I ta tatou mau putuputuraa, eiaha ïa e matau i te haere i rapae aore ra i te tahi atu vahi i te taime e himene ai tatou.
7 Te vai ra te tahi atu ravea no te faaite i to tatou mauruuru no ta tatou upaupa moˈa. I te mau tairururaa, e patahia te upaupa hou a haamata ˈi te porotarama o te mahana taitahi. Piti taime i te matahiti, e haere te mau taeae e tuahine taiva ore no te mau fenua atoa i Patterson, i New York no te haruharu i te upaupa nehenehe mau no ta tatou haamoriraa. Na ratou e aufau i to ratou tere. No reira, ia anihia mai ia parahi i te mau tairururaa no te fanaˈo i ta te pǔpǔ faataˈi upaupa i rave, e faaroo ïa tatou. E tauturu te reira ia tatou ia faaineine i to tatou aau no te porotarama o te mahana.—Ezr. 7:10.
8 I te hopea o ta tatou putuputuraa no teie mahana, e himene tatou i te himene apî “Te faatere nei te Basileia—Ia tae mai!” Ua matara mai te reira i te rururaa matahiti i mairi aˈenei. Ua papaihia teie himene no te mea a 100 matahiti te Basileia o te Atua i te haamauraahia.
9 E mau “mea maitai” iho â tera mau himene apî no ô mai ia Iehova. (Mat. 12:35a) Ia faaoti papu ïa tatou ia haapii e ia himene i te reira ma to tatou aau no te arue e faahanahana i to tatou Atua!—Sal. 147:1.