Te pororaa i te Basileia i na 100 matahiti!
1. Eaha ta to Iehova nunaa i faaitoitohia ia rave a 100 matahiti i teie nei?
1 “Inaha, te faatere ra te Arii! E vea outou na ˈna. No reira, a poro, a poro, a poro i te Arii e to ˈna basileia!” Ma teie mau parau putapû mau ta te taeae Rutherford i faahiti a 100 matahiti i teie nei, ua faaitoitohia to Iehova nunaa ia haaparare i te poroi o te Basileia i te mau vahi atoa. E o ta tatou iho â ïa i rave! Mai te mau Kerisetiano matamua, ua poro tatou i te parau apî oaoa o te Basileia i “te taata atoa i raro aˈe i teie nei raˈi.” (Kol. 1:23) A haamanaˈo ai i te senekele i mairi aˈenei, eaha ta tatou i rave no te poro i te Basileia o te Atua? E nafea tatou e tamau ai i te faaite i te reira a piri mai ai na 100 matahiti o tera Basileia?
2. Mea nafea ta tatou mau papai i te haafaufaaraa i te Basileia o te Atua?
2 Ta tatou i rave: E rave rahi matahiti i teie nei to ta tatou mau papai haafaufaaraa i te Basileia o te Atua. Mai 1939 mai â, teie te upoo parau o ta tatou vea matamua: Te Pare Tiairaa e faaite ra i te Basileia o Iehova. Mea pinepine teie vea i te faataa no nia i te Basileia e ta te reira e faatupu. Ua haafaufaa atoa te vea A ara mai na! i te Basileia o te Atua mai te ravea otahi no te huitaata. Mea tano iho â ïa ia riro teie na vea e piti ei vea huri-rahi-aˈe-hia e opere-rahi-aˈe-hia na te ao!—Apo. 14:6.
3. Eaha te tahi mau ravea ta tatou i faaohipa no te faaite i te poroi o te Basileia?
3 Ua faaohipa to Iehova nunaa i te mau ravea pororaa rau no te faaite i te poroi o te Basileia. I te tau matamua ra, ua poro tatou maoti te mau pereoo haapurororaa, radio e matini afaifai faataˈi pehe. Ua tauturu mau â teie mau ravea ia haaparare i te parau apî oaoa i te taata atoa i te hoê taime mea iti te feia e poro ra i te Basileia. (Sal. 19:4) I te mau matahiti i mairi aˈenei, ua faaohipahia te jw.org no te faaite i te poroi o te Basileia i e mirioni taata, oia atoa i te feia e ora ra i te mau fenua ua taotiahia te pororaa.
4. Eaha te mau faanahoraa taa ê ta tatou i faaohipa?
4 Ua rave atoa to Iehova nunaa i te mau faanahoraa taa ê no te haaparare i te poroi o te Basileia. Ei hiˈoraa, mai te omuaraa o te matahiti 1995, ua rave tatou i te mau tutavaraa ia rahi atu â ta tatou taviniraa, ma te poro i te mau vahi mai te aua huiraatira, te vairaa pereoo e te mau vahi tapihooraa. Aita i maoro aˈenei, ua faanahohia te hoê ohipa taa ê no te poro i roto i te mau oire rarahi na te ao nei. Hau atu â, ua faaohipa e rave rahi mau amuiraa i te iri e vairaa vea turairai i te mau vahi taata roa ˈˈe o ta ratou tuhaa fenua. Tera râ, o te ohipa pororaa i tera e tera fare ta tatou ravea matamua no te faaite i te poroi o te Basileia.—Ohi. 20:20.
5. Eaha ta tatou e nehenehe e rave i te matahiti taviniraa i mua nei?
5 Ta tatou e rave: E rave rahi o te haamata i te matahiti taviniraa i Tetepa ei pionie tamau. E na reira atoa oe? Mai te peu e aita, e nehenehe anei ta oe e tapao ei pionie tauturu i te tahi mau avaˈe? A tavini ai oe ei pionie aore ra aita, e haamaitai iho â Iehova i te mau haapaeraa ta oe e rave no te apiti rahi atu â i roto i te pororaa i te Basileia.—Mal. 3:10.
6. No te aha mea taa ê ai te avaˈe no Atopa 2014?
6 I te avaˈe no Atopa 2014, a 100 ïa matahiti to te Basileia o te Atua i te haamauraahia. No te reira Te Pare Tiairaa no te huiraatira o tera avaˈe i niuhia ˈi i nia i te Basileia o te Atua. A rave i te mau tutavaraa atoa no te opere rahi i teie vea! A tiatonu ai tatou i te tau a muri aˈe, a tamau noa i te faaite i te “parau maitai o te basileia o te Atua” i te taata atoa o te hinaaro e faaroo mai.—Ohi. 8:12.