Ia aravihi atu â i roto i te taviniraa—A tauturu i to oe hoa pororaa

No te aha mea faufaa ˈi? Ua taa ia Iesu i te faufaaraa ia poro e te hoê apiti. A tono ai i ta ˈna mau pǐpǐ e 70, ua faaoti Iesu ia haere ratou e piti taata. (Luka 10:1) E nehenehe te apiti e tauturu atu ia fifihia to ˈna hoa pororaa aore ra ia ore oia e ite nafea ia pahono i te taata. (Koh. 4:9, 10) Ma te horoa ˈtu i to ˈna ite e i te tahi manaˈo tauturu i te tahi taime, e tauturu ïa te apiti i to ˈna hoa pororaa ia aravihi atu â i roto i te taviniraa. (Mas. 27:17) E nehenehe atoa te apiti e tauturu ia ˈna maoti te mau aparauraa faaitoito i roto i te tuhaa fenua.—Phil. 4:8.

Nafea ïa?

Ia poro to oe hoa pororaa, a faaroo maitai. (Iak. 1:19) Ia taiohia te tahi irava, a apee i te reira i roto i ta oe Bibilia. Ua ineine ïa oe i te tauturu atu ia hinaarohia.
A feruri maitai afea e paraparau ai. (Mas. 25:11) Ia apiti atu oe i roto i te hoê haapiiraa Bibilia, eiaha e paraparau noa. Ia poro oe i tera e tera fare, e na to oe hoa pororaa e paraparau i tera taime, a vaiiho ia ˈna ia na reira. Mai te peu râ e e taata poro apî oia aore ra aita e ite nafea ia pahono i te uiraa e te patoiraa, a tauturu atu! I roto i te pororaa i tera e tera fare, i te hoˈi-faahou-raa e farerei aore ra i te haapiiraa Bibilia, eiaha e tâpû i te parau. Eiaha roa ˈtu e paraparau noa aore ra e taui i te tumu parau.
A horoa i to oe ite. I te tahi taime, e nehenehe anei oe e horoa i te hoê manaˈo tauturu i to oe hoa pororaa? A na reira! E aravihi atu â ïa o ˈna i roto i te taviniraa. (Mas. 3:27) I te taime tano, e nehenehe paha oe e parau e: “Eaha to oe manaˈo i ta taua aparauraa?”, “E nehenehe anei au e horoa ˈtu i te tahi manaˈo tauturu?” aore ra “Teie ta ˈu e tamata i te rave.” A haamanaˈo e e hinaaro vetahi i te manaˈo tauturu i te tahi taime. E toaruaru râ ratou ia faahiti-pinepine-hia ta ratou mau hape.

Ta oe e rave i teie avaˈe:

Ia oti te pororaa, a faaite i to oe hoa pororaa i ta ˈna i parau e i rave tei tauturu ia oe.