Haapiiraa o te buka E haafatata ˈtu ia Iehova i te hebedoma o te 6 no Tenuare
1. I te hebedoma o te 6 no Tenuare, na te aha e tauturu mai ia haafatata ˈtu â ˈi ia Iehova?
1 Te hinaaro nei Iehova ia haafatata ˈtu tatou ia ˈna. (Iak. 4:8) No te tauturu ia tatou ia na reira, e hiˈopoahia te buka E haafatata ˈtu ia Iehova i te Haapiiraa Bibilia a te amuiraa. E haamata te reira i te hebedoma o te 6 no Tenuare. Ia au i te fa o tera buka, te parau ra te mau api matamua: “E fatata ˈtu â tatou i te Atua maoti te feruriruriraa i te ravea e faaite ai Iehova i to ˈna mau huru maitatai taitahi, te hiˈoraa mea nafea to Iesu Mesia peeraa i te reira ma te tia roa, e te taaraa e nafea tatou e faahotu atoa ˈi i te reira.” Ua hiˈopoa ê na te mau amuiraa i tera buka i 2004 e 2005. No te rahiraa o na piti mirioni taata poro tei haere mai i te parau mau i muri aˈe, a tahi ra ïa ratou e haapii maite ai i to Iehova mau huru maitatai au mau. No te feia râ tei hiˈopoa ê na i teie buka, e tauturu atu teie haamanaˈoraa ia faarahi atu â i to ratou mauruuru no to Iehova mau huru maitatai.—Sal. 119:14.
2. Mea nafea te buka E haafatata ˈtu ia Iehova e hiˈopoahia ˈi?
2 Mea nafea? E haamata te taeae faatere i te haapiiraa ma te tahi omuaraa poto. Aita i faaitehia eaha te mau irava e tia ia taio, na te taeae faatere ïa e maiti i te reira. Ia hope te haapiiraa taitahi, ei haamanaˈoraa, e ui paha oia hoê aore ra e piti uiraa. Mai te peu râ te vai ra te tumu parau tarenihia “Mau uiraa ei feruriruriraa” o te reira ïa te faaohipahia. Ia taimehia, e nehenehe te taeae faatere e ani ia taiohia te mau irava o te tumu parau tarenihia. I muri iho, e faaohipa oia i te mau uiraa hau no te haamatara ˈtu i te reira.
3. A hiˈopoahia ˈi te buka, ia aha tatou e no te aha?
3 Ia faufaa-roa-hia tatou: A faaineine maitai noa ˈtu e ua haapii ê na oe i teie buka. A apiti i te tauaparauraa, e arue ïa oe ia Iehova e e tauturu atoa te reira ia oe ia haamanaˈo i tei haapiihia. E faufaa-atoa-hia te feia e faaroo ra. (Sal. 35:18; Heb. 10:24, 25) A feruri ai i to Iehova mau huru maitatai faito ore, e haafatata ˈtu â oe ia ˈna. (Sal. 77:11-13) E puai atu â ïa to oe hinaaro ia auraro i ta ˈna mau faaueraa e ia faaite ia vetahi ê o vai mau na oia.—Sal. 150:1-6.