A faaohipa i ta tatou reni no te haapii i ta outou tamarii
1. E tauturu te tuhaa “Tamarii” o ta tatou reni ia aha?
1 No te taata atoa ta tatou reni Internet. I nia jw.org, te vai ra te tuhaa “Tamarii.” (A pata i nia Te Bibilia e outou > Tamarii [reo Farani].) E tauturu te reira i te tamarii e na metua ia vai piri noa a haafatata ˈtu ai ia Iehova. (Deut. 6:6, 7) E nafea ia faaohipa i te reira no te haapii i ta oe tamarii?
2. E nafea ia maiti i te tano i ta oe tamarii?
2 A faatano: Mea taa ê te mau tamarii atoa. (Kor. 1, 13:11) E nafea ia maiti i te tano i ta oe tamarii? A uiui, ‘Eaha te mea anaanatae no ta ˈu tamarii? E taa anei oia i te anihia? Ehia rahiraa taime e faataa no te reira?’ No te tamarii mai te toru matahiti e iti aˈe, e faaohipa paha oe i te mau aamu o te tuhaa “Ta ˈu pehepehe Bibilia” (reo Farani) o ta tatou reni. No te tahi atu utuafare, mea au na ratou te mau faatiaraa o te tuhaa “A haapii i ta outou tamarii” (reo Farani). A hiˈo atoa i to muri nei mau manaˈo.
3. E nafea na metua e faaohipa maitai ai i te tuhaa “No te haamoriraa utuafare”?
3 No te haamoriraa utuafare: E tauturu teie tuhaa i na metua ia haapii i ta raua tamarii. A rave mai i te “Parau aratairaa no te mau metua” (reo Farani) no te ite e nafea ia faaohipa i te tuhaa taitahi e tano no te haamoriraa utuafare. A rave mai i te hohoˈa e a haapii i te tamariirii ma te ani atu ia ohipa i nia i te mau aamu e i te mea paari atu ia hiˈopoa i te reira e ia huti mai i te haapiiraa. Ua taaihia te mau ohipa ˈtoa o te tuhaa taitahi i te hoê aamu aore ra haapiiraa Bibilia. Noa ˈtu e e ere hoê â matahiti to te mau tamarii, e nehenehe iho â te taatoaraa e apiti i te haamoriraa utuafare.
4. Eaha te itehia i roto i te tuhaa “Ia riro oe ei hoa no Iehova”?
4 Ia riro oe ei hoa no Iehova: E tauturu te mau video, himene e hautiraa o teie tuhaa (reo Farani) o ta tatou reni i te mau metua ia haapii i te Parau a te Atua i ta ratou mau tamariirii. (Deut. 31:12) Noa ˈtu e e mea poto te video, e haapiiraa faufaa mau te huti mai. Te vai atoa ra te mau hautiraa no te haapapu atu â i te haapii mai. Mea au na te tamarii ia himene e e ravea ˈtoa te reira no te haamanaˈo i tei haapiihia. No reira e tuu-tamau-hia ˈi i nia i te reni te mau himene o te Basileia e te tahi atu tei papaihia no te mau tamarii.
5. No te aha e mea tia ˈi ia ani te mau metua i ta Iehova turu no te haapii i te parau mau i ta ratou tamarii?
5 E te mau metua, te hinaaro ra Iehova ia riro outou ei mama e papa maitai. A ani ïa ia ˈna e nafea ia haapii i te parau mau i ta outou tamarii. (Tav. 13:8) Ma te turu a Iehova e nehenehe ai e haapii i ta outou tamarii i te mea “e paari ai [ratou] e tae noa ˈtu i te ora i te faaroo i te Mesia ra ia Iesu.”—Tim. 2, 3:15; Mas. 4:1-4.