Hou a poro ai, e titauhia paha oe ia imi
1. No te aha e faatanohia ˈi te tuhaa taviniraa a te hoê amuiraa i te reo?
1 I te Penetekose 33, i muri aˈe i te niniiraahia mai te varua moˈa, ua haamata ihora te mau pǐpǐ a Iesu ‘i te parau i te parau ěê’ i te feia no te mau tuhaa atea o te fenua. (Ohi. 2:4) I te pae hopea, e 3 000 taata tei bapetizohia. Te mea anaanatae, e au ra e te paraparau ra te rahiraa o te mau ratere i te hoê â reo, te Hebera aore ra te Heleni. Ua maiti râ Iehova i te faaite atu i te poroi o te Basileia na roto i to ratou iho reo. No te aha? E farii ohie aˈe te taata i te parau apî maitai a faaroo ai ratou i te reira na roto i to ratou iho reo. I teie mahana, i te mau vahi ua rau te reo, e faatanohia te tuhaa fenua taviniraa a te hoê amuiraa i te reo. (Buka Organisés, api 107, par. 1-2) Aita ta te mau pǔpǔ reo ê e tuhaa fenua taviniraa taa maitai, e poro râ ratou i te feia atoa e paraparau ra i tera reo i roto i te tapura fenua a te amuiraa e turu ra ia ratou e a te mau amuiraa tapiri.
2. (a) Eaha te ohipa imiraa e ihea e titauhia ˈi te reira? (b) E nafea te mau amuiraa e tauturu ai te tahi i te tahi i te vahi ua rau te reo? (c) Ia aha tatou ia itea te feia e paraparau ra i te hoê reo taa maitai?
2 Ia noho oe i te hoê vahi e paraparauhia hoê â reo, e nehenehe oe e poro ohie i tera e tera fare. Mea taa ê râ te tupuraa a noho ai oe i te hoê vahi ua rau te reo. E poro paha te mau amuiraa reo ê atu i te hoê â vahi, e haamaramarama mai paha ratou no nia i te feia e paraparau ra i to oe reo, na ta oe iho â râ amuiraa aore ra pǔpǔ e rave i te rahiraa o te ohipa. (A hiˈo i te tumu parau tarenihia “Tauturu te tahi i te tahi.”) E titauhia paha ïa ia imi, ia uiui oe ia itea te feia e paraparau ra i te hoê reo taa maitai. E nafea ia rave i te ohipa imiraa?
3. Ihea e imi ai e eaha te rahiraa taime e horoa no te ohipa imiraa?
3 Faanahoraa i te ohipa imiraa: Tei te huru o te mau tupuraa e ite ai oe i te rahiraa taime e horoa no te ohipa imiraa i te mau vahi ua rau te reo. Ei hiˈoraa, ehia rahiraa taata e paraparau ra i tera reo i tera vahi? Ehia rahiraa taata poro to reira? Ehia rahiraa vahi nohoraa ta te amuiraa aore ra pǔpǔ? Aita e titauhia ra ia imi i te mau vahi atoa, ia maiti râ te amuiraa i te mau vahi taata roa e te mau vahi ua tano noa te atea. Mea faufaa iho â râ ia faanaho-maitai-hia te imiraa ia nehenehe e rave rahi roa taata e tiaoro i te iˈoa o Iehova.—Roma 10:13, 14.
4. (a) E nafea te ohipa imiraa ia faanahohia? (b) Eaha te tahi mau ravea no te imi i te taata e paraparau ra i te reo ê?
4 Ia ore ia faufaa ore te mau tutavaraa, e faanaho e e haapao maite te tino matahiapo, te tiaau no te taviniraa iho â râ, i tera ohipa imiraa. (Kor. 1, 9:26) I roto i te mau pǔpǔ reo ê, e nehenehe te hoê taeae aravihi, matahiapo aore ra tavini tauturu tei maitihia e te tino matahiapo o te amuiraa e turu ra i tera pǔpǔ, e haapao i te reira. E faanahoraa taa maitai ta e rave rahi amuiraa e pǔpǔ no te imi i te taata. E faaohipa paha ratou i te buka numera niuniu aore ra i te reni Internet no te imi i te mau iˈoa matauhia i roto i tera reo. I muri iho, e taniuniuhia aore ra e farereihia te taata. Na taua ohipa imiraa ra e faaite teihea vahi nohoraa e mea tia ia tapao i nia i te tapura fenua. Mai te peu e e mea ohie ia na reira, e faanaho ïa te tino matahiapo ia apiti mai te taatoaraa o te amuiraa i teie ohipa imiraa i te tahi taime.—A hiˈo i te tumu parau tarenihia “E nafea ia imi i te feia e paraparau ra i to oe reo?”
5. (a) Eaha te tahi mau manaˈo tauturu no te rave i te ohipa imiraa? (b) Eaha te parau atu?
5 Ei fa papu maitai ta tatou i te mau taime atoa tatou e apiti ai i teie ohipa imiraa. E taviniraa hoi te reira. Ia ahu iho â ïa tatou mai te hoê tavini a te Atua. No e rave rahi, ua tauturu te horoaraa i te faaiteraa e te aparauraa na roto i te reo ê ia vai noa te anaanatae e ia haamaitai i to ratou ite i tera reo. Ia tapaohia ïa te taime i ravehia no te ohipa imiraa eiaha râ tei ravehia no te faaineine i te mau tapura fenua e no te imi i te mau iˈoa. Ia itea mai ia tatou te taata e paraparau ra i te reo ê, e tutava tatou i te faaite atu i te parau api maitai a faaara oioi atu ai i te tiaau no te taviniraa aore ra te tahi atu taeae ta ˈna i maiti ia nehenehe te mau tauiraa i nia i te tapura fenua taviniraa ia ravehia. E na reira tatou no te mau taata atoa i anaanatae mai. Noa ˈtu e mea faufaa te ohipa imiraa, ia faaite iho â tatou i te manaˈo aifaito e ia apiti i te mau tuhaa atoa o te taviniraa.—A hiˈo i te tumu parau tarenihia “I roto i te ohipa imiraa, eaha te parau atu?”
6. No te aha mea fifi ai ia imi i te feia tariˈa turi?
6 Imiraa i te feia tariˈa turi: Mea fifi iho â ia imi i te feia tariˈa turi. E titauhia ia tutava papu ma te tuutuu ore. Eita tatou e ite e e taata tariˈa turi teie na nia iho i to ˈna iˈoa, hohoˈa aore ra ahuraa. Hau atu â, e manaˈo paha te mau melo utuafare e hoa e paruru ia ratou ma te ore e horoa mai i te mau haamaramaramaraa. E nehenehe to muri nei mau manaˈo no te imi i te taata tariˈa turi e tauturu i te feia e paraparau ra i te reo ê.
7. (a) E nafea ia imi i te feia tariˈa turi i te mau vahi faaearaa? (b) Maoti te aha e topa ai te hau o te fatu fare?
7 Ua manuïa e rave rahi amuiraa e pǔpǔ reo aparaa rima a imi ai ratou i roto i te mau vahi faaearaa. Ua ite paha te hoê taata i te hoê taata tapiri, hoa ohipa aore ra hoa haapiiraa e faaohipa ra i te reo aparaa rima. Ua ite paha oia i te hoê tapao purumu e faaara ra e tamarii tariˈa turi to te reira vahi. E fetii tariˈa turi paha to ˈna. A haamanaˈo e e nehenehe ta oe ohipa e hiˈo-ino-hia. E topa râ te hau o te fatu fare maoti to oe huru auhoa e ta oe faataaraa poto, haavare ore e te au maitai. Ua manuïa vetahi a faaite ai ratou i te Bibilia aore ra te tahi mau DVD i te fatu fare a ani atu ai e ua matau anei oia i te hoê taata tariˈa turi. E a parau atu ai e te hinaaro nei ratou e faaite i te tiaturiraa Bibilia i te feia tariˈa turi. Eita paha te fatu fare e horoa mai i te mau haamaramaramaraa. E farii râ paha i te tapao i to oe iˈoa, vahi nohoraa aore ra i te hoê titau-manihini-raa i te putuputuraa a te amuiraa ta ˈna e horoa ˈtu i to ˈna fetii aore ra hoa tariˈa turi.
8. E nafea ia tauturu i te hoê amuiraa reo aparaa rima?
8 Hoê aore ra e piti taime i te matahiti, e titau manihini paha te hoê amuiraa reo aparaa rima i te tahi atu amuiraa tapiri reo ê ia tauturu ia ratou ia imi i te feia tariˈa turi i roto i te mau oire o ta ratou tuhaa fenua. I te hoê putuputuraa no te taviniraa a te amuiraa reo aparaa rima, e horoahia te mau aratairaa e te hoê faahiˈoraa no teie huru taviniraa. E apiti te hoê melo o te amuiraa reo aparaa rima i te pǔpǔ taata poro hoê â pereoo e e horoahia ˈtu te hoê tapura fenua e faataa i te vahi e imi ai ratou.
9. E nafea ia imi i te mau vahi e putuputu ai aore ra e tauturuhia ˈi te feia tariˈa turi?
9 Ia imi-atoa-hia i te mau vahi e putuputu e e faaanaanatae ai aore ra e tauturuhia ˈi te feia tariˈa turi e tia ˈi. E ahu iho â ïa te feia poro ia au i te tupuraa. Mea maitai aˈe paha ia aparau i hoê aore ra e piti taata ma te haapao maitai i te horoa ˈtu i te faaiteraa i te pǔpǔ taatoa. Ia manuïa te aparauraa, e ravehia paha ïa te faanahoraa no te farerei faahou.
10. E nafea te feia poro e imi ai i te mau vahi raveraa ohipa?
10 Te tahi atoa ravea, o te faaineineraa ïa i te mau tapura fenua o te mau vahi raveraa ohipa e a farerei atu ai i te taime tano. E faaineinehia ïa hoê no te mau vahi titoraa mori, te tahi atu no te mau vahi puaraa ahu, fare tamaaraa, hotera, aore ra no te tahi atu vahi tapihooraa. Mai te peu e hoê â huru ohipa ta teie mau fare tapihooraa, hoê â huru faaiteraa atoa ïa ta te feia poro. E maitai e e aravihi atu â ïa ratou. Ei hiˈoraa, i te mau hotera e farii nei i te mau hoani tariˈa turi, e faataa poto paha ïa tatou i ta tatou ohipa i te taata farii a pûpû atu ai i te hoê vehî e DVD to roto e te hoê titau-manihini-raa no te hoê putuputuraa a te amuiraa ta ˈna e pûpû atu i te feia tariˈa turi. I te tahi atu mau vahi raveraa ohipa, e ani noa ïa tatou e te faaohipa ra anei te tahi mau rave ohipa aore ra hoani i te reo aparaa rima. Mai te peu e e fare haapiiraa no te feia tariˈa turi to te tuhaa fenua taviniraa, e nehenehe e pûpû atu i te tahi o ta tatou mau DVD no ta ratou vahi vairaa buka.
11. No te aha e tuhaa faufaa o te taviniraa te ohipa imiraa?
11 Ohipa faufaa: E ere i te mea ohie ia imi i te mau taata e paraparau ra i to oe reo. No te mea e tauiui noa te taata i te vahi faaearaa, e taui oioi atoa ïa te huru o te tuhaa fenua taviniraa. E tautooraa ïa ia faaapî i te tapura fenua. Noa ˈtu râ e tuhaa faufaa o te taviniraa te ohipa imiraa. Aita Iehova e paetahi ra a faaue ai oia ia poro. (Ohi. 10:34) To ˈna hinaaro, ‘ia ora te taata atoa e ia noaa te ite i te parau mau.’ (Tim. 1, 2:3, 4) Ia ohipa ïa tatou e o Iehova e te tahi atu no te imi i te feia “aau haavare ore e te au” no te mau reo atoa.—Luka 8:15.
[Tumu parau tarenihia i te api 5]
Tauturu te tahi i te tahi
Ia hinaaro te amuiraa aore ra pǔpǔ i te tauturu no te imi i te feia e paraparau i to ratou reo e e nehenehe e porohia ˈtu, e farerei ïa te tiaau no te taviniraa i te mau matahiapo o te mau amuiraa tapiri reo ê. E mea maitai aˈe paha ia faaara noa i te mau amuiraa ua tano noa te atea aore ra mea rahi te taata e paraparau ra i tera reo. E faaarahia ïa te feia poro o te mau amuiraa i farereihia e ia itea mai te hoê e paraparau ra i tera reo, ia papaihia ïa to ˈna vahi nohoraa e ia horoahia ˈtu i te tiaau no te taviniraa, na ˈna ïa e horoa ˈtu i te amuiraa aore ra pǔpǔ i titau i te tauturu. E nehenehe te mau tiaau no te taviniraa o tera mau amuiraa e rave i te hoê faanahoraa ohie ia porohia te mau tapura fenua ua rau te reo e ia arataihia te feia e anaanatae ra i te amuiraa aore ra pǔpǔ e tano.
Ia itea mai te hoê taata reo ê e anaanatae mau ra (aore ra taata tariˈa turi), ia faaî-oioi-hia ïa te api parau Veuillez suivre l’intérêt (S-43) e ia horoahia ˈtu te reira i te papai parau a te amuiraa. E nehenehe ïa te taata e tauturu-oioi-hia.—A hiˈo i Ta tatou taviniraa i te Basileia no Me 2011, api 3.
[Tumu parau tarenihia i te api 6]
E nafea ia imi i te feia e paraparau ra i to oe reo?
• A ani ia vetahi ê: te mau piahi Bibilia, melo utuafare, hoa ohipa e te vai ra ˈtu â.
• A faaohipa i te hoê buka numera niuniu aore ra i te reni Internet no te imi i te mau iˈoa e vahi nohoraa.
• Ma te haapao maitai, a hiˈo i te mau vahi e tauturuhia ˈi te taata mai te mau fare vairaa buka, te mau piha a te hau e te mau fare haapiiraa tuatoru.
• I roto i te mau vea, a hiˈo i te mau parau faaara no nia i te mau ohipa faanahohia e te pǔpǔ reo ê.
• A haere atu i te mau fare toa e vahi e opere ra i te maa na te taata reo ê.
• Ia faatiahia, a tuu i te hoê vairaa buka e vea i te hoê vahi raveraa ohipa, haapiiraa tuatoru aore ra vahi tapearaa pereoo utaraa taata e haere-pinepine-hia e te taata reo ê.
• Ia au i te ture i to oe fenua, a hoo mai i te hoê buka numera niuniu o te mau vahi tapihooraa aore ra te hoê porotarama roro uira o te mau vahi haere-rahi-hia e te taata i nia i te reni Internet.
[Tumu parau tarenihia i te api 7]
I roto i te ohipa imiraa, eaha te parau atu?
E ore te manaˈo ino ia haafatata roa ˈtu tatou i te taata ma te auhoa e te haavare ore. I te taime matamua mea maitai ia faaite atu i te hoê papai na roto i to ˈna reo.
A aroha ˈtu e a parau atu ai: “Te imi nei matou i te feia reo ․․․․․ no te faaite atu i te tiaturiraa Bibilia. Ua matau anei oe i vetahi?”
A imi ai i te feia tariˈa turi, e nehenehe e parau atu: “Iaorana. E nehenehe anei au e faaite atu i te tahi mea? [Ma te faaohipa i te hoê roro uira afaifai, a faaite atu i te hoê irava no roto mai i te New World Translation i nia i te DVD.] E tuhaa teie o te Bibilia na roto i te reo aparaa rima Marite. Taa ê atu i te Bibilia, te vai atoa ra te mau DVD tamoni ore no te tauturu i te feia tariˈa turi i te pae varua. Ua matau anei oe i te hoê taata tariˈa turi aore ra e fifi ra i te faaroo e o te faaohipa ra i te reo aparaa rima?” Aita anaˈe te taata fare i ite, a faaite atu ïa i te mau vahi i reira paha oia i te farereiraa i te hoê taata tariˈa turi, mai te vahi raveraa ohipa, te fare haapiiraa aore ra i te mau vahi tapiri.