Eaha ta oe oaoaraa ia oe iho?
1. I te mau hopea avaˈe atoa, eaha te riro e oaoaraa no oe?
1 I te mau hopea avaˈe atoa, e titauhia ia faahoˈi te taatoaraa i ta ratou tapura taviniraa, eaha te riro e oaoaraa no oe? (Gal. 6:4) E pionie taa ê paha tatou o te tapao 130 hora aore ra e taata poro fariihia ia tapao 15 minuti, ia oaoa tatou paatoa i ta tatou taviniraa ia Iehova ma te aau atoa e tia ˈi.—Sal. 100:2.
2. No te aha e horoa ˈi i te mea maitai roa ˈˈe na Iehova?
2 Ei Fatu e Arii o te ao taatoa, e mea tia ia horoa na Iehova i te mea maitai roa ˈˈe. (Mal. 1:6) No to tatou here ia ˈna i pûpû ai tatou i to tatou oraraa no te rave i to ˈna hinaaro. I te hopea o te mahana aore ra i te hopea avaˈe, mai te peu e ua horoa iho â tatou i te mea maitai roa ˈˈe o to tatou taime, aravihi e puai no te tavini ia Iehova, e oaoa mau â tatou. (Mas. 3:9) Mai te peu râ e e faahapahapa mai to tatou manaˈo haava, e feruri anaˈe ïa eaha te rave no te haamaitai atu.—Roma 2:15.
3. No te aha e ere ai i te mea paari ia faaau ia oe ia vetahi ê?
3 Eiaha e faaau atu ia vetahi ê: E ere i te mea paari ia faaau ia oe ia vetahi ê aore ra ia oe iho a apî noa ˈi oe. E taui hoi te tupuraa. E taa ê atoa te aravihi. E aratai te faaauraa ia oe ia vetahi ê ia tataˈu aore ra ia manaˈo e mea faufaa ore oe. (Gal. 5:26; 6:4) Aita Iesu i faaau noa ˈtu, ua haapopou râ ia au i ta te taata i rave.—Mar. 14:6-9.
4. Eaha te haapii mai i ta Iesu parabole no te mau taleni?
4 I roto i ta Iesu parabole no te mau taleni, ua fanaˈo te rave ohipa atoa i te taleni ia au i to ratou iho aravihi. (Mat. 25:15) A hoˈi mai ai to ratou fatu, ua ani oia no nia i ta ratou ohipa. Ua haapopouhia te feia atoa tei ohipa maite ia au i tei maraa ia ratou e ia au i to ratou iho tupuraa. Haere atura ratou i roto i te oroa oaoaraa a to ratou fatu. (Mat. 25:21, 23) A tamau atoa ˈi tatou i te poro i te Basileia, e nehenehe tatou e tiaturi i te haamaitairaa a te Atua a oaoa ˈtu ai.