A vai ara noa i roto i te pororaa
1. No te aha e titauhia ˈi te paari i roto i te pororaa?
1 Ei “mamoe i rotopu i te mau luko,” te poro nei te mau tavini a te Atua “i rotopu i teie nei ui piˈo e te mârô.” (Mat. 10:16; Phil. 2:15) Te haapapu maira te mau faatiaraa peapea mau o te mau aroraa tivira, te mau nahoa haavî uˈana, e te mau haruraa taata e te ‘tupu ra to te feia ino e te rahi noa ˈtura.’ (Tim. 2, 3:13) Ia faaohipa tatou i teihea mau aratairaa Bibilia e ‘paari ai tatou’ i roto i te pororaa?—Mat. 10:16.
2. Eaha te mau tupuraa e titauhia ˈi ia taui oioi i te tuhaa fenua no te poro i te tahi atu vahi?
2 A ohipa ma te paari: Te haamahitihiti ra te Maseli 22:3 i te paari e ‘ape ai tatou’ i te ino. E vai ara noa anaˈe! E nehenehe te mau huru tupuraa i te hoê vahi atâta ore e taui taue. E ite paha outou ia horohoro te mau mutoi aore ra ia putuputu rahi te taata na te aroâ. I te tahi taime, e faaara mai paha te hoê taata maitai. E mea paari ïa ia taui oioi i te vahi i te hiˈo noa i te ohipa e tupu ra.—Mas. 17:14; Ioa. 8:59; Tes. 1, 4:11, 12.
3. E nafea ia faaohipa i te Koheleta 4:9 i roto i te pororaa?
3 A ohipa e vetahi: Ua matau paha oe i te poro oe anaˈe ma te haapeapea ore. Mai tera noa anei i teie nei? I te tahi vahi, e. I te tahi atu râ vahi, mea maitai aˈe eiaha te hoê tuahine aore ra taata apî ia poro o ˈna anaˈe, i te ahiahi iho â râ. Te parau ra te Koheleta 4:9: “E maitai te taata toopiti i te taata hoê.” Ua ite tatou e mea faufaa te hoê hoa poro vai ara. (Koh. 4:10, 12) A haapao maitai ïa ia ore te mau taata o te pǔpǔ ia fifihia. A haamataro i te faaara i te feia poro hou a faarue ai i te tuhaa fenua.
4. Ia aha tatou e te mau matahiapo?
4 A ‘faaitoito ai ratou ia tatou,’ te horoa ra te mau matahiapo i te aratairaa tano ia au i te mau tupuraa. (Heb. 13:17) Ia ohipa maite tatou e o ratou e ia faaite tatou i te aau faahaihai, e haamaitai mai iho â Iehova. (Mika 6:8; Kor. 1, 10:12) E tamau anaˈe ïa i te poro ma te aravihi e ma te vai ara atoa.