A poro noa!
1. Mea nafea to tatou iteraa e ua poro noa na te mau Kerisetiano o te senekele matamua?
1 Ma te tuutuu ore, ua faaite te mau Kerisetiano itoito matamua i te parau apî maitai i te vahi taata. (Ohi. 5:42) Mea fifi ia feruri e aita ratou i paraparau atoa i te feia e haere ra na nia i te purumu a poro ai ratou na te mau fare. Aore ra, i rave i te taime no te poro ma te faanaho-ore-hia ia haere ratou i te matete ua oti anaˈe ta ratou taviniraa. Mai ia Iesu, ua poro noa ratou.—Mar. 6:31-34.
2. Eaha ta to tatou iˈoa e faataa ra?
2 Ia ineine noa: E faataa to tatou iˈoa, Ite no Iehova, i ta tatou e rave ra e o vai tatou. (Isa. 43:10-12) Ia ineine noa ïa tatou i te paruru i to tatou tiaturiraa noa ˈtu e aita tatou e haere ra i tera e tera fare. (Pet. 1, 3:15) Te feruri ra anei oe i te mau tupuraa e poro ai oe ma te faanaho-ore-hia e i muri iho i ta oe e parau atu? E papai anei ta oe no te opere i te feia i anaanatae? (Mas. 21:5) Ia nehenehe, e poro noa anei oe na te mau fare, aore ra e faaite atoa oe i te parau apî maitai i te taata i te tahi atu vahi?
3. No te aha eita ˈi e tano ia parau pororaa “taa ê” no te pororaa na te aroâ, i te vahi tapearaa pereoo, aua faafaaearaa, pu raveraa ohipa e te vai ra ˈtu â?
3 E ere i te pororaa “taa ê”: I te tahi mau taime, e faaohipahia te parau “pororaa taa ê” no te pororaa na te aroâ, i te vahi tapearaa pereoo, aua faafaaearaa, pu raveraa ohipa e te vai ra ˈtu â. Ia parauhia pororaa “taa ê,” e manaˈohia e e titauhia te tutavaraa taa ê aore ra na te taata poro noa e maiti. Ua parau Paulo e ua poro oia i te “vahi taata” e i tera e tera fare. (Ohi. 20:20) E mea tano aˈe ïa ia parau te pororaa i te “vahi taata” eiaha râ te pororaa “taa ê.” O te pororaa i tera e tera fare iho â ta tatou ohipa matamua e te manuïa aˈe no te tufa i te poroi o te Basileia i te taata. I te senekele matamua, ua poro te mau Kerisetiano i te taata eiaha râ i te fare. Ua paraparau iho â ïa ratou no nia i te parau mau: i te vahi taata, ma te faanaho-ore-hia e i tera e tera fare. Ia tuea atoa ïa to tatou huru feruriraa e to ratou no te rave faahope roa i ta tatou taviniraa.—Tim. 2, 4:5.