A poihere i te pororaa
1. E nafea e rave rahi e hiˈo ai i ta tatou pororaa?
1 No te ao a Satani, mea “maamaa” ta tatou pororaa. (Kor. 1, 1:18-21) Ia ara tatou. E nehenehe tera mau manaˈo e haaparuparu ia tatou. (Mas. 24:10; Isa. 5:20) No te aha e poihere ai i ta tatou fanaˈoraa taa ê ei Ite no Iehova?—Isa. 43:10.
2. No te aha e ohipa moˈa ˈi te taviniraa?
2 E “ohipa moˈa”: I roto i te reo tumu o te Bibilia, ua faaau Paulo i te taviniraa i te hoê “ohipa moˈa.” (Roma 15:15, 16) No te aha? Ia apiti tatou i te pororaa, e riro tatou ei “hoa rave ohipa” no Tei moˈa ra o Iehova e e haamaitai tatou i to ˈna iˈoa. (Kor. 1, 3:9; Pet. 1, 1:15) E ‘tusia haamaitai’ ta tatou pororaa no Iehova. E tuhaa faufaa roa ïa te reira o ta tatou haamoriraa.—Heb. 13:15.
3. No te aha e haamaitairaa rahi ai te pororaa i te evanelia?
3 Mea iti te fanaˈo ra i te haamaitairaa rahi ia poro i te evanelia. E oaoa te mau melahi i te haapao e i te rave maite i tera ohipa. (Pet. 1, 1:12) Ua maiti râ Iehova ia tatou te taata tia ore, e “farii repo” hoi, no teie fanaˈoraa taa ê faahiahia!—Kor. 2, 4:7.
4. E nafea ia faaite e te poihere ra tatou i te taviniraa?
4 E ohipa faufaa roa: Ia poihere mau tatou i ta tatou fanaˈoraa taa ê, o te taviniraa ïa hoê o te mau ohipa faufaa roa ˈˈe o to tatou oraraa. (Phil. 1:10) E faataa ïa tatou i te taime i te mau hebedoma atoa no te apiti atu. Ia poihere te hoê taata faataˈi upaupa i ta ˈna fanaˈoraa e hauti i roto i te hoê pǔpǔ tuiroo, e faaineine oia ia ˈna hou a hauti ai i mua i te taata e e haamaitai atu â i ta ˈna huru hauti. Oia atoa, e faaineine tatou ia tatou hou a haere ai e poro no te ‘tufa i te parau mau ma te tia’ e no te aravihi atu â i te poro.—Tim. 2, 2:15; 4:2.
5. O vai te oaoa nei i ta tatou pororaa?
5 Eiaha te manaˈo o te rahiraa o te taata ia haaparuparu ia oe. A haamanaˈo e e taata â te oaoa nei i te ite ia oe. Eita râ tatou e imi i te farii maitai o te taata. Te mea faufaa roa ˈˈe: ia oaoa Iehova. Mea faufaa roa ta tatou mau tutavaraa no ˈna.—Isa. 52:7.