No te taata huru rau ta tatou mau vea
1. E nafea te tavini haapao maitai e te paari e pee ai i te hiˈoraa o Paulo?
1 Ia noaa “te taata atoa nei,” ua faatano Paulo i ta ˈna huru faaiteraa i te parau apî maitai i te taata ta ˈna e farerei. Ia raea te mau taata o te mau nunaa e tiaturiraa atoa, te faaohipa nei te tavini haapao maitai e te paari i Te Pare Tiairaa e te Réveillez-vous! (Kor. 1, 9:22, 23) No te faaohipa maitai i teie mau vea, mea maitai ia haamanaˈo no vai te reira i te papairaahia.
2. No vai te Réveillez-vous!
2 Réveillez-vous!: Ua faaineinehia teie vea no te hoê â huru taata i “te mau taata [no] Ateno” ta Paulo i paraparau. (Ohi. 17:22) E ere ratou i te Kerisetiano e ua ite rii ratou i te mau Papai. Oia atoa, te feia taio o te Réveillez-vous!, o te feia ïa tei ite rii i te Bibilia aore ra aita roa ˈtu. Peneiaˈe aita ratou i ite i te mau haapiiraa Kerisetiano, e manaˈo ino to ratou i te haapaoraa aore ra aita ratou i ite e e faufaahia ratou ia faaohipa i te Bibilia. Te hoê fa faufaa roa o teie vea, ia tiaturi ïa te taata taio i te vai-mau-raa o te Atua. E te tahi atu fa, o te paturaa ïa i to ratou faaroo i te Bibilia e te tautururaa ia ratou ia taa e mea taa ê te mau Ite no Iehova.
3. No vai te neneiraa taitahi o Te Pare Tiairaa?
3 Te Pare Tiairaa: Te faatura nei te mau taata taio o te neneiraa na te taatoaraa i te Atua e i ta ˈna Parau. Ua ite ratou i te Bibilia, aita râ e taa papu ra i to te reira mau haapiiraa. Hoê â ratou e te feia “mǎtaˈu i te Atua” ta Paulo i faahiti. (Ohi. 13:14-16) No te mau Ite no Iehova na mua te neneiraa no te haapiiraa o Te Pare Tiairaa. No Paulo, ua ite te feia e taio i ta ˈna mau rata i te mau Papai e i te parau mau. (Kor. 1, 1:1, 2) Ua papaihia atoa te mau tumu parau i roto no te feia e haere ra i te mau putuputuraa e tei matau i te huru paraparau e te mau tiaturiraa a te mau Ite no Iehova.
4. No te aha e haamatau ai i teie mau vea i roto i te pororaa?
4 I roto te pororaa, e peu matauhia te pûpûraa i na vea e piti, hoê noa râ ta tatou e vauvau. A haamatau maitai ïa i teie mau vea ia nehenehe te taata ta oe e farerei e anaanatae i te tauaparauraa.