No te aha e poro ai i te Tapati?
1. Eaha te haapii mai i ta Paulo e to ˈna mau hoa i rave i Philipi?
1 E Sabati teie, te faafaaea nei te rahiraa o te mau ati Iuda no Philipi. Tei ǒ nei Paulo e to ˈna mau hoa no te hoê tere mitionare. Aita e taata e faahapa ia ratou ia haamâha atoa i to ratou rohirohi. Ua ite râ ratou e tei rapaeau te mau ati Iuda i te oire no te pure. Haere atoa ˈtura ïa ratou e poro i ǒ. Ua faaroo atu Ludia e ua bapetizohia oia e to ˈna utuafare taatoa. Eaha râ paha Paulo e to ˈna mau hoa i te oaoa! (Ohi. 16:13-15) Mea rahi te faafaaea nei i te Tapati, no te aha e ore ai e poro ia ratou i tera mahana?
2. Eaha ta te nunaa o Iehova i faaruru no te poro i te Tapati ma te ore e haapeapeahia?
2 Tei faaruruhia no te poro i te Tapati: I 1927, ua faaitoitohia te nunaa o Iehova ia faataa i te taime i te mau Tapati atoa no te poro. Ua patoi-oioi-hia râ te reira. I Marite, mea rahi tei tapeahia no te ofatiraa i te mau ture o te Sabati i te Tapati, te faahuehueraa, e te hoohooraa aita e parau faatia. Aita râ te nunaa o Iehova i faaea i te poro. I te mau matahiti 1930, ua faanaho ratou i te mau pǔpǔ taata poro no te mau amuiraa tapiri o te haere e poro i te tahi tuhaa fenua. No te rahi o te taata poro, aita i tia i te feia mana ia tapea ia ratou! Te taa mau ra anei oe i te mau haapaeraa a teie mau taeae ia nehenehe tatou e poro i te Tapati ma te ore e haapeapeahia?
3. No te aha e mahana maitai ai te Tapati no te poro?
3 E mahana maitai roa no te poro: I te Tapati, tei te fare te rahiraa o te taata. E pinepine, mea mǎrû aˈe paha ratou. E farii maitai aˈe paha te feia haere pure ia tauaparau no nia i te Atua. Mai te peu e e putuputuraa ta tatou i te Tapati, no te aha e ore ai e poro na mua ˈˈe aore ra i muri aˈe i te putuputuraa i te mea e ua oti ê na tatou i te faanehenehehia? Ia hinaarohia, a faaineine i te tahi maa iti.
4. Eaha ta tatou e fanaˈo ia poro i te Tapati?
4 Ia faataa tatou i te taime no te poro i te Tapati, e taime â to tatou no te haamâha i to tatou rohirohi. E e ite tatou i te mauruuru ia apiti i te taviniraa moˈa. (Mas. 19:23) E oaoa atoa paha tatou i te farerei i te taata mai ia Ludia!