E faaiteraa puai te horoahia
1. Hau atu â i te oreroraa parau, eaha ta te taata e maere i te Oroa haamanaˈoraa? A faataa.
1 Afea? I te po o te Oroa haamanaˈoraa. E tutavaraa rahi tei ravehia no te titau manihini i te taata ia apiti mai ia tatou. Eita noa ratou e maere i ta ratou e faaroo. Ua faahiti taa ê te hoê vahine tei tae atu i te Oroa haamanaˈoraa i ta ˈna i ite: te auhoaraa o te taata, te nehenehe e te mâ o te piha i patuhia e i tamâhia e te mau rima tauturu. O tatou paatoa ïa, eiaha noa te taeae orero, te nehenehe e horoa i te faaiteraa i teie tupuraa faufaa roa ˈˈe o te matahiti.—Eph. 4:16.
2. E nafea tatou paatoa e horoa ˈi i te faaiteraa i te taata?
2 A farii maitai i te taata: E nehenehe te hoê “Iaorana!” ma te mata ataata e horoa i te hoê faaiteraa. (Ioa. 13:35) Noa ˈtu e eita e nehenehe e paraparau i te taata atoa, ma te oaoa, a faaite atu i to oe iˈoa i tei pihai iho ia oe. (Heb. 13:1, 2) A hiˈohiˈo i te feia i ore paha i matau i te tahi atu. Ua titau-manihini-hia paha ratou i te roaraa o te opereraa. E ui atu paha oe, “A tahi ra oe e haere mai ai?” A haaparahi ia ratou i pihai iho ia oe ma te haapapu e e pahono oe i ta ratou mau uiraa. Ia faarue oioi ta oe amuiraa i te piha ia nehenehe te tahi atu amuiraa e faaohipa i te reira, e parau paha oe, “E hinaaro vau e ite i to oe manaˈo i te porotarama. E nafea tâua e farerei faahou ai?”
3. E nafea ia farii maitai i tei ore e poro faahou ra?
3 A farii maitai i tei ore e poro faahou ra: E tae mai iho â paha te feia e ore e poro faahou ra. No vetahi o ratou, o te Oroa haamanaˈoraa noa paha ta ratou e apiti ra. A farii maitai atu, e a faaite e te oaoa mau ra oe i te ite ia ratou. (Roma 15:7) I muri iti noa ˈˈe, e nehenehe te mau matahiapo e haere i ǒ ratou no te faaitoito atu ia apiti noa mai i te amuiraa. Ia faahanahana e rave rahi i tae mai i te Atua maoti te mau ohipa maitai ta ratou e ite eiaha noa ta ratou e faaroo, ta tatou ïa e hinaaro.—Pet. 1, 2:12.