A faaineine i ta outou tamarii no te taviniraa
1. Te titau ra te Salamo 148:12, 13 i te mau metua Kerisetiano ia aha?
1 Te titau ra Iehova i te feia apî ia haamaitai ia ˈna. (Sal. 148:12, 13) E haapii te mau metua Kerisetiano i ta ratou tamarii i te pue parau mau Bibilia e i ta te Atua mau ture morare, e faaineine atoa râ ia ratou ia poro i te evanelia. E nafea e raea mǎrû noa ˈi tera fa?
2. E nafea te hiˈoraa maitai o te metua e ohipa ˈi i nia i ta ˈna tamarii?
2 Hiˈoraa maitai: Ua parau te tavana Gideona i ta ˈna na taata e 300: “E hiˈo mai outou ia ˈu.” (Tav. 7:17) E hiˈo e e pee iho â te tamarii i te hiˈoraa o to ratou metua. Te ohipa nei te hoê papa i te po. A hoˈi ai i te fare i te poipoi Mahana maa, eita oia e haere e taoto, e rave râ oia i ta ˈna tamarii no te haere e poro noa ˈtu to ˈna rohirohi. Ma te parau ore, te haapii nei oia ia ratou e mea faufaa roa te taviniraa. (Mat. 6:33) Te ite ra anei ta outou mau tamarii ia outou ia rave ma te oaoa i te mau tuhaa rau o te haamoriraa, mai te pure, te taioraa i te Bibilia, te pahonoraa, e te pororaa? Eita iho â ïa outou e riro ei hiˈoraa maitai roa. E hoona râ ta outou mau tutavaraa e haapii i ta outou tamarii ia haamori ia Iehova ia ite ratou e te tavini maite ra outou ia ˈna.—Deut. 6:6, 7; Roma 2:21, 22.
3. Ia tauturu te mau metua i ta ratou tamarii ia haamau e ia raea mǎrû noa i teihea mau fa no nia i te haamoriraa?
3 Te mau fa: Ma te itoito, e haapii te mau metua i ta ratou tamarii ia haere, ia paraparau, ia faanehenehe, e te vai ra ˈtu â. A paari ai ratou, e fa apî te tuuhia ˈtu. E tauturu atoa te mau metua Kerisetiano i ta ratou tamarii ia haamau e ia raea mǎrû noa i te mau fa no nia i te haamoriraa ia au i to ratou matahiti e aravihi. (Kor. 1, 9:26) Te haapii ra anei outou ia ratou ia pahono na roto i ta ratou iho mau parau e ia faaineine i ta ratou tumu parau no te Haapiiraa no te taviniraa Kerisetiano? (Sal. 35:18) Te faaineine ra anei outou ia ratou ia apiti i te mau tuhaa rau o te taviniraa? Te haamau ra anei outou ei fa na ratou te bapetizoraa e te taviniraa taime taatoa? Te tauturu ra anei outou ia ratou ia amuimui i te feia poro oaoa rahi o te faaitoito ia ratou?—Mas. 13:20.
4. Eaha ta te tamarii e fanaˈo ia faaineine to ratou metua ia ratou i roto i te taviniraa mai te nainairaa mai â?
4 Ua na ô te papai salamo: “Na oe, e tau Atua, i haapii mai ia ˈu mai to ˈu apîraa mai â; e ua faaite au i ta oe ra mau ohipa umerehia e tae roa aˈenei i teie nei.” (Sal. 71:17) A faaineine i ta outou tamarii no te taviniraa i te nainairaa iho â. A paari noa ˈtu ai, e fanaˈo ratou i te niu pae varua ta outou i faahotu!—Mas. 22:6.