Ua ite anei oe i te mau ravea?

Te rahi noa ˈtura te mau pu rapaauraa na te ao e tâpû nei ma te toto ore. Ua ite e ua maramarama anei oe i te mau ravea no te rapaau ma te toto ore? Mea faufaa roa ia ite oe i te reira no te faaoti maite eaha te ravea rapaauraa e te tâpûraa e maiti. A mataitai i te video Pas de sang: la médecine relève le défi. I muri iho, a pure e a hiˈo faahou i ta oe i haapii maoti to muri nei mau uiraa.—Nota: Na te mau metua e faaoti e mataitai atu e ta ratou mau tamarii apî aore ra eita, e hohoˈa tâpûraa poto hoi to roto.

(1) Eaha te tumu matamua roa e patoi ai te mau Ite no Iehova i te pâmuraa toto? (2) No nia i te ravea rapaauraa, eaha ta te mau Ite no Iehova e hinaaro? (3) Eaha te tiaraa mau o te feia maˈi? (4) No te aha mea tano e mea paari ai ia maiti i te mau ravea monoraa i te pâmuraa toto? (5) Ia pau rahi te toto, eaha na ohipa ru e piti ta te mau taote e faatura na mua? (6) Eaha na manaˈo tumu e maha o te mau ravea monoraa i te pâmuraa toto? (7) E nafea te mau taote e nehenehe ai (a) e faaiti mai i te toto e pau, (b) e faaherehere i te toropuru ura, (c) e faaaraara i te hamaniraa toto, e (d) e rave faahou mai i te toto i tahe? (8) A faataa i te mau ravea rapaauraa mai (a) te faatarapaperaa toto e (b) te rave-faahou-raa mai i te toto i tahe. (9) Ia faaarahia oe i te aha no nia i te mau ravea monoraa atoa i te pâmuraa toto? (10) No te mau tâpûraa atâta e te fifi roa, e nehenehe anei e ore e pâmu i te toto? (11) Eaha te feruriraa maitai e itehia ra i rotopu i te mau taote?

Na te taata taitahi e faaoti e farii anei i te mau ravea rapaauraa o te video, ia au i to ˈna iho manaˈo haava haapiihia e te Bibilia. Ua rave anei oe i te hoê faaotiraa taa maitai i nia i te mau ravea rapaauraa ta oe e farii no oe e no ta oe mau tamarii a faaî atu ai i te tareta Instructions médicales (DPA)? No te faahohonu roa ˈtu â, a hiˈopoa maite i te “Uiraa a te feia taio” o Te Pare Tiairaa o te 1 no Tiurai 2004 e o te 15 no Atopa 2000. A faaohipa atoa i na tapura e piti o te api hau o Ta tatou taviniraa i te Basileia no Novema 2006, “Eaha ta ˈu faaotiraa no nia i te mau tuhaa o te toto e te mau ravea rapaauraa o te faaohipa i to ˈu iho toto?” I te pae hopea, ia papu ia oe e ua papai maitai oe i ta oe mau faaotiraa i nia i ta oe tareta Instructions médicales (DPA). Ia faaara-roa-hia te feia ta oe i maiti no te turu ia oe e te mau melo utuafare e ere i te Ite no nia i ta oe mau faaotiraa.