Ia nafea e te mau hoa faaipoipo e ere i te Ite?
1. No te aha na te taatoaraa e tauturu i te hoa faaipoipo o te hoê Ite ia farii i te parau mau?
1 E feia poro anei i roto i ta outou amuiraa e hoa faaipoipo to ratou e ere i te Ite? Te hinaaro nei iho â paha ratou ia haamori atoa to ratou hoa faaipoipo ia Iehova. E ere râ o ratou anaˈe. Mai te Atua, te hinaaro ra te amuiraa taatoa “i te taata atoa ia ora, e ia noaa te ite i te parau mau.” (Tim. 1, 2:4) Ia nafea tatou e te mau hoa faaipoipo e ere i te Ite o ta tatou amuiraa?
2. E nafea te haroaroaraa e tauturu mai ai a haa ˈi e te hoa faaipoipo e ere i te Ite?
2 Ia tamata na mua tatou i te taa i te manaˈo o te hoa faaipoipo. Te here ra e rave rahi i to ratou utuafare e te tutava ra i te riro ei hoa faaipoipo e ei metua maitai. E tiaturiraa faaroo taa ê paha to ratou i to tatou. Maori te mau manaˈo hape ta to ratou mau hoa i parau atu, peneiaˈe mea iti ta ratou i ite no nia i te mau Ite no Iehova. Te rave ra to ratou apiti i te taime, no to ratou utuafare hoi i na mua ˈˈe, no te haamori ia Iehova. Te inoino ra paha vetahi i te reira. E tauturu mai te haroaroaraa ia haa ma te hamani maitai e te faatura ia ore ratou ia huru ê.—Mas. 16:20-23.
3. Eaha te ravea maitai aˈe ia taui te tahi hoa faaipoipo i to ˈna manaˈo?
3 A anaanatae atu: Te ravea maitai aˈe ia farii te hoê hoa faaipoipo i te parau mau, mea na roto ïa na mua i ta tatou e rave eiaha i te tahi aparauraa Bibilia. (Pet. 1, 3:1, 2) E mea faufaa ïa ia anaanatae atu. E na reira paha te mau tuahine o te amuiraa i te hoê vahine faaipoipo e ere i te Ite e te mau taeae i te mau tane. E nafea?
4. E nafea ïa?
4 Mai te peu e aitâ oe i ite i te hoa faaipoipo, no te aha e ore ai e tauaparau e te apiti Kerisetiano? Eiaha e inoino ia ore te hoa faaipoipo e ere i te Ite e farii. No to tatou huru auhoa e to tatou haapaoraa ˈtu ia ˈna, e hiˈo maitai aˈe mai paha oia i te mau Ite no Iehova. (Roma 12:20) Ua titau manihini te tahi mau Kerisetiano feruriraa paari i te hoê hoa faaipoipo e to ˈna utuafare ia tamaa, no te matau maitai aˈe ia ˈna e no te faaore i te tahi paha manaˈo oti noa. Ua paraparau ratou no nia i ta ˈna e anaanatae ra eiaha râ i nia noa i te mau tumu parau pae varua. I muri aˈe, aita anaˈe oia e haama faahou, e nehenehe e paraparau no nia i te Bibilia. Aore ra e farii paha oia ia titau manihini tatou ia ˈna ia haere mai i te hoê putuputuraa no te hiˈo i ta ta ˈna vahine e haapii ra, ia matau iho â râ oia vetahi i roto i te amuiraa. Noa ˈtu e aita oia i ineine i te haapii, e nehenehe oia e haapopouhia, te turu ra hoi oia i to ˈna hoa faaipoipo Kerisetiano.
5. Ia nafea te mau matahiapo?
5 Ia haapao atoa ˈtu te mau matahiapo e ia moemoe ratou i te mau ravea no te poro atu. E faaroo paha te tahi tei ore i farii i te aparauraa Bibilia i to te reira faaitoitoraa ia mau oia i te fare maˈi aore ra ia maˈi-ino-mau–hia oia. Mai te peu e e ati te hoê utuafare, mai te poheraa o te hoê melo utuafare, e ani paha te mau matahiapo i te hoa faaipoipo e ere i te Ite ia parahi atoa mai a tamahanahana ˈi ratou i te utuafare.
6. No te aha e na reira ˈi?
6 A feruri na i te oaoa o te hoê Kerisetiano ia farii e ia haere mai to ˈna hoa faaipoipo i te parau mau! E oaoa rahi atoa Iehova, te mau melahi, e te toea o ta tatou amuiraa. (Luka 15:7, 10) Ia ore râ oia e farii oioi, e oaoa noa tatou i te mea e te haafaufaa ra Iehova, ‘aita roa hoi i hinaaro ia pohe atu te hoê ia noaa paatoa râ te tatarahapa,’ i ta tatou mau tutavaraa.—Pet. 2, 3:9.
[Parau iti faaôhia i te api 6]
Te ravea maitai aˈe ia farii te hoê hoa faaipoipo i te parau mau, mea na roto ïa na mua i ta tatou e rave eiaha i te tahi aparauraa Bibilia