‘E parau-haere-hia te evanelia’!
1. E nafea tatou e ite ai e aita e mea e tapea i te pororaa?
1 Aita iho â e mea e tapea ia Iehova ia faatupu i to ˈna hinaaro. (Isa. 14:24) I mua i te hoê nuu 135 000 taata no Midiana, e au ra e eita te tavana Gideona e to ˈna 300 taata e manuïa. Ua parau râ Iehova ia ˈna: “Na oe e faaora ia Iseraela i te rima o te ati Midiana: e ere anei ua tono vau nei ia oe?” (Tav. 6:14) Eaha te ohipa ta Iehova e turu ra i teie mahana? Ua na ô Iesu: “E parau-haere-hia te evanelia o te basileia nei e ati noa ˈˈe teie nei ao.” (Mat. 24:14) Aita e taata e nehenehe e tapea i teie ohipa!
2. No te aha e tiaturi ai e e tauturu Iehova ia tatou iho i roto i te pororaa?
2 E tauturu Iehova ia tatou iho: E tauturu Iehova i to ˈna mau Ite ei pǔpǔ. E nehenehe atoa anei e tiaturi e e tauturu Oia ia tatou iho? A hinaaro ai te aposetolo Paulo i te tauturu, ua turu Iehova ia ˈna na roto i ta ˈna Tamaiti, Iesu. (Tim. 2, 4:17) E haamaitai atoa mai ïa Iehova i ta tatou iho mau tutavaraa no te rave i to ˈna hinaaro.—Ioa. 1, 5:14.
3. Afea Iehova e tauturu ai ia tatou?
3 E faaere anei te mau haapeapearaa o te oraraa ia oe i to oe itoito no te pororaa? “Te horoa nei oia i te itoito no te matapouri,” aore ra rohirohi. (Isa. 40:29-31) Tei mua anei oe i te hamani-ino-raa aore ra te patoiraa? “E tuu oe i ta oe hopoia ia Iehova ra, e na ˈna oe e tauturu mai.” (Sal. 55:22) Te ere ra anei oe i te tiaturi i te tahi taime? “E haere oe, e ei pihai-atoa-iho vau i to vaha.” (Exo. 4:11, 12) E maˈi anei to oe o te taotia ra i ta oe taviniraa? E haafaufaa e e faaohipa Iehova i ta oe mau tutavaraa atoa noa ˈtu e e mea haihai.—Kor. 1, 3:6, 9.
4. Ia aha tatou ia tiaturi tatou ia Iehova?
4 “To [Iehova] te rima i faatorohia ra, e na vai e faahoˈi mai?” (Isa. 14:27) Ma te tiaturi i ta Iehova haamaitairaa i nia i ta tatou taviniraa, e tamau anaˈe i te poro “i te parau a te Fatu ma te mǎtaˈu ore.”—Ohi. 14:3.