Mea aravihi anei au i te poro?
1. No te aha eiaha ˈi tatou ia manaˈo e e ere tatou i te mea aravihi i te poro?
1 Mai te peu e ua ui ê na oe ia oe i te reira, eiaha e haapeapea! E ere na te huru haapiiraa ta tatou i fanaˈo aore ra te tahi ite natura faahiahia e faariro ia tatou ei taata poro aravihi. E feia ‘haapii-ore-hia e te itea ore’ vetahi mau pǐpǐ matamua. Noa ˈtu râ, e feia poro aravihi o te parau apî maitai ratou no te mea ua pee ratou i te hiˈoraa o Iesu ma to ratou aau atoa.—Ohi. 4:13; Pet. 1, 2:21.
2. Mai te aha te haapiiraa a Iesu?
2 Ta Iesu haapiiraa: E mea ohie, papu no te mau taata atoa, e mea maramarama maitai ta ˈna haapiiraa. E huti oia i te ara-maite-raa o te feia e faaroo ra na roto i ta ˈna mau uiraa, hiˈoraa, e omuaraa taa-maitai-hia. (Mat. 6:26) Ua anaanatae mau oia i te taata. (Mat. 14:14) Hau atu â, ma te ite e na Iehova i tono mai ia ˈna e i haamana ia ˈna no te amo i ta ˈna hopoia, ua paraparau Iesu ma te papu e te mana.—Luka 4:18.
3. E nafea Iehova e tauturu mai ai ia rave i ta tatou taviniraa?
3 Ta Iehova tauturu: Na roto i ta ˈna Parau e faanahonahoraa, te faaineine nei to tatou Orometua Rahi ia tatou ia poro i te parau apî maitai ma te manuïa. (Isa. 54:13) Ua faaherehere Iehova i te hoê faatiaraa o ta Iesu huru haapiiraa, e nehenehe ïa tatou e hiˈopoa e e pee i ta ˈna mau huru raveraa. Te horoa maira Iehova i to ˈna varua moˈa e te haapii nei ia tatou i te mau putuputuraa a te amuiraa. (Ioa. 14:26) Te horoa atoa maira oia i te feia poro aravihi o te tauturu ia tatou ia maitai atu â.
4. No te aha tatou e aravihi ai i te poro i te parau apî maitai?
4 I te mea e “no ǒ mai . . . i te Atua” to tatou aravihi, e aravihi iho â ïa tatou i te poro. (Kor. 2, 3:5) Ia turui tatou i nia ia Iehova e ia faaohipa maitai tatou i ta ˈna mau faanahoraa î i te here e aravihi roa ˈi tatou i te mau ohipa maitatai atoa.—Tim. 2, 3:17.