Pororaa i te feia reo ê
1. Ia poro tatou i ta tatou tuhaa fenua, eaha te nehenehe e tupu mai?
1 Ua tohu Iesu e e porohia te evanelia e ati aˈe te ao “ia ite te mau fenua atoa.” Ua ite te feia atoa e poro ra e e haapii ra ia vetahi ê i te faufaaraa o taua mau parau ra. (Mat. 24:14; 28:19, 20) A poro e a faariro ai tatou i te taata ei pǐpǐ, e farerei paha tatou i te feia reo e nunaa ê. E tano ia faaroo ratou atoa i te poroi o te Basileia e ia turu papu i te parau mau hou te mahana riaria o Iehova e tae mai ai. (Mal. 3:18) E nafea ia poro i te feia reo ê o ta tatou tuhaa fenua?
2. E nafea ia pee ia Iehova ia paraparau tatou i te feia reo ê?
2 A hiˈo i te feia reo ê mai ia Iehova: No te here ma te paetahi ore i te taata atoa o ta tatou tuhaa fenua mai ia Iehova, e titauhia ia hinaaro roa tatou e tauturu ia ratou ia ite papu i te Atua mau ra o Iehova, noa ˈtu eaha to ratou reo. (Sal. 83:18; Ohi. 10:34, 35) E haapao na mua iho â tatou i te feia e paraparau ra i te reo o te amuiraa ta tatou e apiti ra. Ia haapao atoa râ tatou i te mau hinaaro o te feia reo ê e ia imi i te mau ravea no te faaite atu i te poroi o te Basileia o te Atua. Ia ore tatou e tâuˈa ia ratou, aita ïa e tuati ra i te opuaraa a Iehova e poro i te feia o te mau fenua atoa. E nafea ïa tatou e tauturu ai ia ratou?
3. Eaha te buka iti faufaa tei horoahia mai, e e nafea ia faaineine ia tatou no te faaohipa ˈtu?
3 Une bonne nouvelle pour des gens de toutes nations: Ia faaohipahia teie buka iti ia farerei tatou i te feia reo ê. A rave i teie buka iti i te mau taime atoa, a hiˈo i te mau tuhaa taa ê i roto, e ia ineine oe i te faaohipa ˈtu. No te faaohie, a tapao i te mau reo rau o ta oe tuhaa fenua. E mea maitai ia rave maa papai na roto i teie mau reo no te horoa ˈtu i muri aˈe i te faaohiparaa i te poroi i roto i te buka iti.
4. E nafea ia faaohipa i te buka iti Nations i roto i te taviniraa?
4 Ia farerei oe i te hoê taata reo ê i roto i te taviniraa e aita oe i papu eaha to ˈna reo, a faaite atu i te paa rapaeau o te buka iti. A hiˈo i te hohoˈa fenua i te paa o roto mai, a tohu ia oe e i to oe fenua, e a faataa ˈtu e te hinaaro ra oe e ite nohea mai o ˈna e eaha to ˈna reo. Ua taa anaˈe ia oe to ˈna reo, a hiˈo i te tapura tumu parau, a imi i te api tano, a faaite atu i te pereota papai-meumeu-hia i nia roa, e a ani atu ia taio i te poroi. Ia oti ta ˈna taioraa, a pûpû atu i te hoê api parau na roto i to ˈna reo aore ra a faaite atu i te pereota tei renihia, o te faataa ra e te hinaaro ra oe e hoˈi mai e te hoê papai na roto i to ˈna reo. A tohu i te parau “to ˈu iˈoa” e a faahiti papu i to oe iˈoa. A tohu i “to oe iˈoa” e a vaiiho i te taata ia pahono. A faanaho no te farerei-faahou-raa.
5. Eaha ta tatou e rave no te haapao maitai i te feia reo ê tei anaanatae?
5 A atuatu i te anaanatae: A tutava i te farerei i te feia tei anaanatae i te poroi o te Basileia, noa ˈtu eaha to ratou reo. Ua papu anaˈe ia tatou to ratou anaanatae i te Atua e i ta ˈna Parau, te Bibilia, e faaî tatou i te api parau Veuillez suivre l’intérêt (S-43). A horoa oioi atu i te papai parau o te amuiraa o te faatae i te reira i te amaa ia farereihia teie taata e te hoê taata poro o te paraparau i to ˈna reo. I muri iho, e hapono te amaa i te api parau i te pǔpǔ reo ê e tano. Ia tae atu te api parau, e farerei-oioi-hia taua taata ra. E nehenehe te papai parau e horoa i te tahi api parau na te tiaau no te taviniraa, ia ite oia i te anaanatae tei faaitehia e te hoê pǔpǔ reo ê. Ia faaîhia teie api parau ia anaanatae mau te taata.
6. Eaha ta tatou hopoia ia farerei tatou i te hoê taata reo ê tei anaanatae?
6 Mai te taime a faaîhia ˈi te api parau S-43 e tae roa ˈtu i te farereiraahia te taata tei anaanatae e te hoê taata poro tei maitihia o te paraparau i to ˈna reo, tau taime te mairi. No reira, no te atuatu i te anaanatae i faaitehia, e nehenehe te taata poro tei faaî i te S-43 e hoˈi e hiˈo i taua taata ra e tae noa ˈtu i te taime e farereihia ˈi oia e te taata poro o te paraparau i to ˈna reo. I te tahi taime, e nehenehe e faatere i te haapiiraa Bibilia. A tiai noa ˈtu ai râ, e nafea e noaa ˈi te mau papai na roto i te reo o te taata tei anaanatae?
7. Eaha te ravea e noaa ˈi te mau papai na roto i te reo o te feia ta tatou e farerei?
7 Papai reo ê: Eiaha te mau amuiraa e haaputu rahi i te mau papai reo ê. Ia faaoti râ te tiaau no te taviniraa e te anaanatae ra te hoê pǔpǔ reo ê i te parau mau, e manaˈo paha oia e e tano ia haaputu maa papai na roto i taua reo ra no te feia poro. Aita anaˈe e papai ta te amuiraa, a ani ïa. Eita paha te reira e tae oioi mai. E nehenehe ïa e nenei i te mau tumu parau i nia i te www.watchtower.org. E noaa oioi i te taata poro aore ra te taata tei anaanatae e rave rahi papai na roto e hanere reo. E tauturu mau â teie ravea i te atuatu i te anaanatae o te feia reo ê.
8. Eaha te tuhaa a te amuiraa i roto i te atuaturaa i te anaanatae o te feia reo ê?
8 Tuhaa a te amuiraa: I te tahi taime, ua rahi roa te taata reo ê, aita râ e amuiraa tapiri na roto i taua reo ra. A titau manihini ïa i te feia reo ê tei anaanatae i ta outou mau putuputuraa. E nehenehe te farii-popou-raa e te anaanataeraa ˈtu e faaitoito ia ratou ia amui tamau mai. I te omuaraa, e fifi paha ratou no te reo e te taˈere. Aita râ e fifi to te here Kerisetiano mau i roto i te faanahonahoraa i te ao a te mau Ite no Iehova. (Zeph. 3:9; Ioa. 13:35) Te paraparau ra anei oe i te tahi atu reo? Mai te peu e e, e ua ineine oe i te atuatu i te anaanatae na roto i taua reo ra, a faaite ïa i te papai parau o ta oe amuiraa, o te faaara ˈtu i te amaa. E tauturu te reira i te amaa o te imi nei i te hoê taata poro no te reira.
9. Afea e e nafea te haapiiraa i te feia poro i te hoê reo e haamauhia ˈi?
9 Haapiiraa i te hoê reo: A tauturu ai oe i te feia reo ê, e mea maitai aˈe ia faaitoito ia ratou ia apiti i te amuiraa o to ratou reo mai te peu e e ere i te mea atea roa. Ia ore anaˈe râ, e faaoti paha te tahi feia poro e haapii i te tahi atu reo no te tauturu maitai aˈe atu. Aita anaˈe e amuiraa tapiri, e faaoti paha te amaa i te haamau i te hoê haapiiraa reo ê no te rahi o te taata tumu aore ra no te fenua ê. E faaara ïa te amaa i te mau amuiraa tapiri i te hinaaro e vai ra e i te haapiiraa reo ê. Ia haamau te feia e amui atu i taua haapiiraa ra i te fa e apiti atu i te pǔpǔ aore ra amuiraa no te turu atu.
10. Afea e haamau ai i te hoê pǔpǔ reo ê, e ia au i te aha?
10 Haamauraa i te hoê pǔpǔ: No te haamau i te hoê pǔpǔ reo ê, ia faaîhia e maha titauraa rahi. (1) Ia navai te anaanatae i roto i taua reo ra. (2) Ia ite aore ra te haapii ra te hoê pǔpǔ iti feia poro i te reo. (3) Ia vata te hoê matahiapo aore ra tavini tauturu aravihi no te aratai hoê aˈe putuputuraa i te hebedoma na roto i taua reo ra. (4) Ia ineine te hoê tino matahiapo i te turu i te pǔpǔ. Ia faaî-au-noa-hia teie mau titauraa, e papai ïa te tino matahiapo i te amaa no te horoa ˈtu i te mau haamaramaramaraa no nia i te pǔpǔ e no te ani i te parau faatia ia turu te amuiraa i te pǔpǔ reo ê. (A hiˈo i te buka Organisés, api 106-107.) E “tiaau pǔpǔ” aore ra e “tavini pǔpǔ” te matahiapo aore ra te tavini tauturu o te haapao i te pǔpǔ.
11. No te aha e fanaˈoraa taa ê ai e poro i te feia reo ê o ta tatou tuhaa fenua?
11 Te pororaa i te feia reo ê o ta tatou tuhaa fenua, e tuhaa faufaa roa ïa o te ohipa pororaa i te ao nei ta Iesu Mesia, ei Hiˈoraa no tatou, i haamau. Ia rave ïa tatou i ta tatou tuhaa ma te itoito rahi, a ite atu ai e nafea Iehova e faaueue noa ˈi i te mau nunaa e e faatae ai i tei hinaarohia ia ˈna ra. (Hag. 2:7) Auê te oaoa ia turu roa i teie ohipa! Ia haamaitai Iehova i ta tatou mau tutavaraa amui no te poro i te feia reo ê o ta tatou tuhaa fenua, a haamanaˈo noa ˈi tatou e e tia i te Atua ia faatupu noa ˈtu te mau taotiaraa o te reo!—Kor. 1, 3:6-9.