A turu i te Faatereraa arii a te Atua i teie nei â!
A feruri na e e mataˈi rorofai atâta mau te piri mai ra. E faaroo noa oe i te faaararaa ru: “A HORO! HAERE IMI I TE VAHI PAPU!” Eaha te rave? E haere iho â oe e imi i te vahi papu.
E faaû tatou paatoa i teie “vero” atâta mau. O ta Iesu ïa i faataa mai te “ati rahi.” (Mataio 24:21) Eita e nehenehe e horo ê noa. Eaha râ te rave ia paruruhia tatou?
I roto i ta ˈna Aˈoraa i nia i te mouˈa, ua horoa Iesu Mesia i teie aratairaa: “A tamau i te imi na mua i te Faatereraa arii a te Atua e ta ˈna parau-tia.” (Mataio 6:33) E nafea ïa?
E imi na mua i te Faatereraa arii a te Atua. Eaha ïa te auraa? Ia riro te Faatereraa arii a te Atua ei mea faufaa roa ˈˈe i roto i to tatou oraraa. (Mataio 6:25, 32, 33) No te aha? No te mea eita te taata e nehenehe e faatitiaifaro i te mau fifi peapea mau o te huitaata. O te Faatereraa arii a te Atua anaˈe te nehenehe e na reira.
E imi i ta ˈna parau-tia. E titauhia ia tutava i te pee i ta te Atua mau ture e aratairaa parau-tia. No te aha? No te mea na tatou anaˈe e faaoti eaha te mea maitai e te mea ino, e ati to mua. (Maseli 16:25) I te tahi aˈe pae, ia pee tatou i ta te Atua mau aratairaa, e oaoa te Atua e e faufaahia tatou.—Isaia 48:17, 18.
A tamau i te imi na mua i te Faatereraa arii a te Atua e ta ˈna parau-tia. Ua faaara Iesu e nehenehe vetahi e fariu ê a imi ai i te haapuraa i roto i te moni. Area vetahi ê, aita to ratou e taime faahou no te imi i te Faatereraa arii a te Atua no te mau haapeapearaa o te oraraa.—Mataio 6:19-21, 25-32.
Ua fafau râ Iesu e e horoahia te mau mea faufaa o te oraraa i teie nei â i te feia e turu ra i te Faatereraa arii a te Atua. E i mua nei, i te mau haamaitairaa mure ore.—Mataio 6:33.
Noa ˈtu e ua imi na mua te mau pǐpǐ a Iesu i te Faatereraa arii a te Atua e ta ˈna parau-tia, aita ratou i ite mata i te hopea o te mau mauiui atoa. Ua paruruhia râ ratou. Mea nafea?
Ua pee ratou i te mau aratairaa parau-tia a te Atua. Na te reira i paruru ia ratou i te mau fifi faaruruhia e te feia tei tâuˈa ore i ta te Atua mau aratairaa. Maoti to ratou tiaturiraa papu e e tae mai te Faatereraa arii a te Atua, aita ratou i tuu i mua i te mau fifi peapea roa ˈˈe o te oraraa. E ua horoa ˈtu te Atua i “te puai o te hau ê i to te taata nei” no te faaoromai i te fifi.—Korinetia 2, 4:7-9.
E IMI NA MUA ANEI OE I TE FAATERERAA ARII?
Ua pee te mau Kerisetiano matamua i ta Iesu faaueraa e imi na mua i te Faatereraa arii. Ua faaite haere ratou i te parau apî oaoa i ta ratou mau tuhaa fenua. (Kolosa 1:23) E taata anei te na reira ra i teie mahana?
E! Ua taa i te mau Ite no Iehova e e tau ru teie. Fatata te taime e haamou ai te Faatereraa arii a te Atua i te faanahoraa o te ao nei. Te rave nei te mau Ite no Iehova i tei nehenehe no te pee i ta Iesu faaueraa: “E porohia te parau apî oaoa o te Faatereraa arii e ati aˈe te fenua ia ite te mau nunaa atoa, i reira ïa te hopea e tae mai ai.”—Mataio 24:14.
Eaha ta oe e rave a faaroo ai i te parau apî oaoa? A pee i te hiˈoraa o te mau taata no Berea i Makedonia a faaroo ai i te aposetolo Paulo ia poro i te parau apî oaoa o te Faatereraa arii. Ua farii ratou i te reira “ma te aau tae mau.” ‘Hiˈopoa maitai aˈera ratou i te mau Papai’ no te hiˈo e mea mau anei ta ratou i faaroo e ua faaohipa ratou i te reira.—Ohipa 17:11, 12.
E nehenehe atoa oe e na reira. Ma te imi na mua i te Faatereraa arii a te Atua e ta ˈna parau-tia, e fanaˈo oe i te haapuraa e te parururaa i teie nei â. Oia atoa i te hau e te ino ore e vai e a muri noa ˈtu i mua nei.