I raro aˈe i ta te Atua faatereraa, ua vai hoê e ua vai hau noa tei poietehia

No te aha tatou e hinaaro ai i te Faatereraa arii a te Atua?

I te omuaraa roa, o to tatou Atua poiete ra, o Iehova to ˈna iˈoa, te Faatere otahi. Mea î i te here ta ˈna huru faatereraa. Ua hamani oia i te nohoraa nehenehe mau no te taata i te ô i Edene. Ua horoa ˈtu o ˈna i te maa e rave rahi e i te ohipa faufaa mau. (Genese 1:28, 29; 2:8, 15) Ahiri te taata i vai noa i raro aˈe i te faatereraa î i te here a te Atua, e vai hau noa ïa ratou.

Adamu e tapea ra i te maa o te tumu raau opanihia ta Eva i pûpû atu. — Ua patoi na taata matamua i te Atua ei Faatere

Te faaite ra te Bibilia e ua patoi te hoê melahi orure hau, tei piihia i muri aˈe Satani te Diabolo, i to te Atua tiaraa e faatere. Ua parau o ˈna e e oaoa aˈe te taata aita anaˈe te aratairaa e te faatereraa a te Atua. Ma te peapea, ua pee to tatou na metua matamua ra o Adamu raua Eva ia Satani e ua orure hau i te Atua.—Genese 3:1-6; Apokalupo 12:9.

Ua patoi Adamu raua Eva i te Atua ei Faatere. Ua ere ïa raua i te paradaiso e te tiaturiraa e ora e a muri noa ˈtu ma te ea tia roa. (Genese 3:17-19) Hoê â huru no te tamarii ta raua i fanau mai. Ia au i te Bibilia, no te hara a Adamu ‘i ô mai ai te hara i te ao nei e te pohe na roto i te hara.’ (Roma 5:12) Teie atoa te tahi atu faahopearaa o te hara: “Ta te taata nei faaheporaa ˈtu i te taata e pohe atura ei pohe no ˈna iho.” (Koheleta 8:9) Eaha te auraa? E fifi iho â te taata ia faatere ratou ia ratou iho.

UA FA MAI TE FAATERERAA TAATA

Nimeroda e tia ra ma te teoteo. I muri mai ia ˈna, te patu ra te taata i te hoê pare. — Ua patoi Nimeroda ia Iehova

O Nimeroda, te taata faatere matamua i roto i te Bibilia. Ua patoi o ˈna i te faatereraa a Iehova. Tae roa mai i teie mahana, ua faaohipa te taata i to ratou tiaraa mana ma te tano ore. A 3 000 matahiti aˈenei, ua papai te arii Solomona: “E inaha, te roimata o te feia i hamani-ino-hia! aita râ o ratou e haamahanahana: e te mana hoi tei te paeau hamani ino.”—Koheleta 4:1.

Hoê â huru i teie mahana. Ua faaite te hoê papai a te Nunaa Amui i 2009 e te papu roa ˈtura e o “te huru faatereraa ino te tahi tumu o te mau ino atoa i teie mahana.”

UA TAE TE TAIME NO TE TAUI!

E hinaaro te taata i te tia faatere e i te faatereraa maitai aˈe. Tera iho â ta to tatou Atua poiete i fafau!

Hohoˈa: Te mau faahopearaa o te faatereraa taata. 1. Te hoê vahine no Asia e parahi ra i roto i te hoê aroâ reporepo a tapea noa ˈi i ta ˈna tamarii e auê ra. 2. Te hoê taata paari maˈihia i nia i to ˈna roˈi i te fare maˈi. 3. Faehau i te vahi aroraa e pupuhi ra i te tahi atu. 4. Te mau taata patoitoi e tutuô ra e ta ratou mau paruai no te faaite i to ratou manaˈo mauruuru ore. 5. Te hoê vahine e ta ˈna tamahine e tia ra i rapaeau mai i to raua fare o te hiˈo ra i te hiˈo o ta raua uputa fare tei tupararihia. 6. Te hoê oire i roto i te auauahi repo e te mau reni uira e rave rahi. — Aita i tia i te faatereraa taata maitai roa ˈˈe ia faaafaro i te mau fifi peapea mau o te huitaata

Ua haamau te Atua i te hoê Faatereraa arii o te mono i te mau faatereraa taata atoa e “e vai tera e a muri noa ˈtu.” (Daniela 2:44) No tera Faatereraa arii e mirioni taata e pure ai. (Mataio 6:9, 10) E ere râ na te Atua e faatere mai. Ua faatoroa o ˈna i te hoê Arii o tei ora na ei taata. O vai ta te Atua i maiti?