Te faaohipa ra anei oe i te buka Haaferuriraa?
1. Mea nafea to te aposetolo Paulo e to Iesu haapiiraa ia vetahi ê?
1 Ua faaitoito te aposetolo Paulo i te ‘parau,’ aore ra haaferuri i nia, “i te parau i papaihia ra.” (Ohi. 17:2, 3; 18:19) Te pee ra ïa oia ia Iesu, o tei faahiti pinepine i te mau Papai e tei faaohipa i te mau faahohoˈaraa no te tauturu i te feia e faaroo ra ia ˈna ia taa i te hinaaro o te Atua. (Mat. 12:1-12) Ua neneihia te buka Haaferuriraa i nia i te mau Papai no te tauturu ia tatou ia na reira.
2. E nafea ia faaohipa i te buka Haaferuriraa no te faaineine i te mau omuaraa parau maitatai?
2 No te faaineine i te mau omuaraa parau maitatai: Te vai ra te mau omuaraa parau o te faaara i te anaanatae i te mau api 9-15 o te buka Haaferuriraa i nia i te mau Papai. Ia haapii e ia faaohipa oe i te mau omuaraa parau taa ê, i roto iho â râ i te mau tuhaa fenua poro-pinepine-hia, e rau ïa te huru o ta oe taviniraa e e riro atu â oe ei mea faaau ohie e te aravihi no te haamata i te mau aparauraa. E nehenehe oe e taio i te mau omuaraa parau i roto roa i te buka ia poro oe na roto i te niuniu paraparau aore ra te interphone o te hoê fare tahua paruru-maitai-hia.
3. Eaha te mau manaˈo i te mau api 15-24 o te buka Haaferuriraa e tauturu ia tatou i roto i te taviniraa?
3 No te pahono i te mau patoiraa: No te aha e ore ai e feruri na mua i te mau patoiraa e nehenehe e fa mai i roto i ta oe tuhaa fenua e e rave maa minuti hou te pororaa no te hiˈo faahou i te mau api 15-20 no te ite e nafea ia pahono? E Bouddhiste, e Hindou, e ati Iuda, aore ra e Mahometa anei te tahi mau fatu fare? Mai te peu e e, e tauturu te mau haamaramaramaraa i te mau api 20-24 ia oe.
4. E nafea ia faaohipa i te buka Haaferuriraa ia tuuhia mai te hoê uiraa aore ra te hoê tumu parau aimârôhia?
4 No te pahono i te mau uiraa: E tauturu atoa te buka Haaferuriraa ia tatou ia tuuhia mai te hoê uiraa aore ra te hoê tumu parau aimârôhia. A parau noa ˈtu i te taata e e hinaaro oe e faaite ia ˈna i te tahi mea anaanatae no nia i te tumu parau e a rave i ta oe buka. I te mea e mea anaihia te mau tumu parau ia au i te piapa, a hiˈo i te tumu parau ta oe e manaˈo ra e to roto te mau haamaramaramaraa ta oe e hinaaro. E a hiˈo oioi i te mau uiraa papai-meumeu-hia. Ia ore oe e ite oioi i ta oe e imi ra, a hiˈo i te tapura faahororaa i te hopea o te buka. Ua ite anaˈe oe i te mau haamaramaramaraa e tano, a taio roa ˈtu i roto i te buka. Mai te peu e e irava taa maitai te aparauhia ra, e nehenehe oe e hiˈo i te tuhaa “Mau irava Bibilia e pinepine mea hape te faaohiparaahia” i te api 445.
5. Eaha te tahi atu â mau faaohiparaa faufaa o te buka Haaferuriraa?
5 No te tahi atu â mau faaohiparaa: E afai vetahi i te buka Haaferuriraa i ta ratou ohipa aore ra i te haapiiraa no te pahono i te mau uiraa, mai ‘No te aha outou e ore ai e faatupu i te mau oroa?’ Ua faaohipa te tahi feia apî i na tumu parau “Poieteraa” e “Tauiuiraa o te mau mea ora” no te faaineine i te mau vauvauraa. E haere anei oe e hiˈo i te hoê taata maˈi aore ra ua pohe tei herehia e ana? E nehenehe te tumu parau “Faaitoitoraa” e tauturu ia oe ia horoa i te tamahanahanaraa no ǒ mai i te mau Papai. E manaˈo anaanatae atoa to roto i te buka Haaferuriraa no te faaineine i te mau vauvauraa e no te faatere i te mau putuputuraa no te pororaa.
6. Eaha ta tatou fa ia poro tatou?
6 Ia poro tatou, e ere ta tatou fa i te haapapuraa e ua tano tatou; e ere atoa i te horoa-noa-raa ˈtu i te mau haamaramaramaraa. E hinaaro tatou e haaferuri ma te aravihi i nia i te mau Papai. Ma te faaohipa maitai i te buka Haaferuriraa, te faaite ra tatou e te haapao maite noa nei tatou i ta tatou e haapii ra i te taata.—Tim. 1, 4:16.