E nehenehe oe e riro ei orometua haapii!
1. Eaha te ravea taa ê e vai ra no te mau taata poro atoa i te Basileia?
1 Hoê o te mau tuhaa faahiahia roa ˈˈe o te taviniraa, o te haapiiraa ïa i te parau mau i te hoê taata. Te iteraa ia ˈna ia farii i te poroi o te Basileia e te tautururaa ia ˈna ia haafatata ˈtu â i te Arii o te ao taatoa, e tupuraa ïa e mea tia ia poihere. (Iak. 4:8) E mea maitai ia haamau te mau taata poro atoa i te Basileia i te fa e haapii i te hoê taata e poia nei i te parau mau a ite atu ai ia ˈna ia haamata i te rave i te mau tauiraa rahi i nia i to ˈna huru, to ˈna feruriraa, e to ˈna haerea.—Mat. 28:19, 20.
2. No te aha vetahi e taiâ ˈi i te faatere i te hoê haapiiraa bibilia, e eaha te tauturu ia ratou ia faaruru i tera fifi?
2 A tiaturi ia Iehova: I te tau tahito, ua uiui te tahi mau tavini haapao maitai no nia i to ratou aravihi e rave i ta ratou ohipa faauehia. Ma te tiaturi i te Atua ra o Iehova, ua nehenehe Mose, Ieremia, Amosa, e vetahi atu mau taata au noa e haavî i to ratou iho mau feaaraa aore ra papu-ore-raa e e rave i te hoê ohipa faufaa roa. (Exo. 4:10-12; Ier. 1:6, 7; Amo. 7:14, 15) Ua “itoito â” te aposetolo Paulo atoa. Mea nafea? Ua faaite oia e mea na roto ïa ‘i to tatou Atua.’ (Tes. 1, 2:2) Oia, e nehenehe tatou paatoa e tiaturi ia Iehova no te ho mai i te tauturu, te paari, e te puai hinaarohia no te faatere i te mau haapiiraa bibilia hotu maitai.—Isa. 41:10; Kor. 1, 1:26, 27; Pet. 1, 4:11.
3, 4. Teihea faaineineraa e tauturu ia tatou i roto i te haapiiraa i te Parau a te Atua?
3 A farii i te faaineineraa: Te faaineine ra to tatou Orometua Rahi roa ˈˈe, te Atua ra o Iehova, ia tatou na roto i te hoê porotarama haapiiraa pae varua tamau ia aravihi roa ˈtu â tatou ei orometua haapii. (Isa. 54:13; Tim. 2, 3:16, 17) A farii i tera faaineineraa ma te haafaufaa roa i te mau ravea ia maramarama roa ˈtu â oe i te mau Papai e ia haamaitai i to oe aravihi i te haapii i te pue parau mau bibilia ia vetahi ê. Tera te fa matamua o te Haapiiraa o te taviniraa teotaratia e o te Putuputuraa no te taviniraa, te faaineine ra râ te mau putuputuraa atoa a te amuiraa ia tatou ia niu i ta tatou haapiiraa i nia i te Parau a te Atua.
4 A tutava i te imi i te mau ravea ohie no te haapii i te taata i te pue parau mau pae varua hohonu atoa. Te faataa ra te buka École du ministère, api 227: “E mea tia ia taa maitai ia tatou ta tatou tumu parau na mua mai te peu e e hinaaro tatou ia maramarama vetahi ê i te reira.” E tauturu te pahonoraa i te mau putuputuraa ia tatou ia haamau i te mau manaˈo faufaa i roto i to tatou feruriraa no te faaohipa i mua ˈtu. A faaineine maitai ïa, e e rahi atu â ïa oe i te tiaturi i to oe aravihi i te haapii.
5. Eaha vetahi atu â faaineineraa ta tatou e fanaˈo ra i roto i te amuiraa no te tauturu ia tatou ia haere i mua ei orometua haapii?
5 I te omuaraa iho â, aita e feaaraa e ua haapii te mau tavini Kerisetiano na roto i te tahi atu a apiti ai i te ohipa faariroraa i te taata ei pǐpǐ. (Luka 10:1) Ia nehenehe, a haere na muri i te feia poro aravihi, tae noa ˈtu te mau pionie, te mau matahiapo, e te mau tiaau ratere, i roto i te ohipa haapiiraa i te Bibilia. A tapao e nafea ratou e faaohipa ˈi i te mau faahohoˈaraa e te tahi atu mau tauturu haapiiraa ohie o ta tatou mau papai no te faataa i te pue parau mau bibilia. A ani ia ratou i te tahi mau manaˈo tauturu e nafea oe e nehenehe ai e riro ei orometua haapii maitai aˈe. (Mas. 1:5; 27:17) Ia mauruuru tatou no teie mau faaineineraa atoa i te mea e e faaineineraa no ǒ mai i te Atua ra.—Kor. 2, 3:5.
6. Eaha te titau-mau-hia no te riro ei orometua haapii i te Parau a te Atua?
6 A tiaturi ia Iehova, e a haafaufaa i te faaineineraa ta ˈna e horoa ra. A pure no ta oe haereraa i mua. (Sal. 25:4, 5) E nehenehe oe atoa e ite i te oaoa i te tautururaa i te tahi taata ia riro mai ia oe, te hoê orometua haapii i te Parau a te Atua!