Porotarama apî o te mau putuputuraa
1, 2. Eaha te mau tauiraa no nia i te mau putuputuraa e haamata i Tenuare 2009?
1 I te hebedoma o te 21-27 no Eperera 2008, ua faaroo te huitaeae na te ao nei i te hoê parau faaite oaoa. “Mai te 1 no Tenuare 2009, e faatupuhia te Haapiiraa buka a te amuiraa i te hoê â taime e te Haapiiraa o te taviniraa teotaratia e te Putuputuraa no te taviniraa. E tauihia te iˈoa Haapiiraa buka a te amuiraa ei Haapiiraa bibilia a te amuiraa.”
2 Porotarama: Te taime taatoa e ravehia no teie mau putuputuraa, to roto atoa te mau himene e pure, e 1 hora e 45 minuti ïa. E haamata te putuputuraa ma te himene e te pure (5 mn), apeehia e te Haapiiraa bibilia a te amuiraa (25 mn). I muri iho i te reira, te Haapiiraa o te taviniraa teotaratia ïa (30 mn). Ua oti anaˈe, e omua mai te hoê himene (5 mn) i te Putuputuraa no te taviniraa (35 mn). E hope te putuputuraa ma te himene e te pure (5 mn). No te tauturu ia outou ia faaineine i teie mau putuputuraa, e neneihia te porotarama o te Haapiiraa bibilia a te amuiraa, te Haapiiraa o te taviniraa teotaratia, e te Putuputuraa no te taviniraa i te mau avaˈe atoa i roto i Ta tatou taviniraa i te Basileia.
3. E nafea te Haapiiraa bibilia a te amuiraa e faaterehia ˈi?
3 Haapiiraa bibilia a te amuiraa: E faaterehia teie putuputuraa mai te Haapiiraa o Te Pare Tiairaa. Aita e faufaa ia haamata e te hoê hiˈo-faahou-raa i tei haapiihia i te hebedoma i mairi. Ia haapoto–roa-hia râ te omuaraa. E vaiiho ïa te reira i te taime hinaarohia ia horoa te taatoaraa o te feia i putuputu mai i te mau tatararaa poto. E haapao te tiaau peretiteni ia maitihia te mau matahiapo taa ê no te faatere i teie putuputuraa i te mau hebedoma atoa.
4. I nia i teihea faito e taui ai te Putuputuraa no te taviniraa?
4 Putuputuraa no te taviniraa: Hoê â tereraa to teie putuputuraa mai na mua ˈˈe, e haapoto-noa-hia râ te reira. E ravehia e pae minuti no te mau parau faaara. E navai tera taime no te mau parau faaite faufaa roa e te tahi mau rata a te amaa. Aita e faufaa ia taiohia na mua mai te mau parau faaite mai te mau putuputuraa no te pororaa, te porotarama no te tamâraa, te tapura faufaa moni, e te mau rata matauhia a te amaa, e tuuhia râ te reira i nia i te iri piaraa ia taio te mau taeae i te reira. E titauhia ia faaineine maitai te mau taeae e tuhaa faataahia ta ratou i reira ia faatura i te taime faataahia e i te mau faaueraa horoahia.
5. I te hebedoma a tere mai ai te tiaau haaati, eaha te porotarama o te mau putuputuraa a te amuiraa?
5 Ia tere mai te tiaau haaati: Eita te porotarama tahebedoma a te tiaau haaati e taui. I te Mahana piti, e himene to muri iho i te Taviniraa o te haapiiraa teotaratia e te Putuputuraa no te taviniraa. I reira, e horoa te tiaau haaati i te hoê oreroraa parau e 30 minuti i te maoro. Mai te ravehia ra i teie nei taime i te hebedoma o to ˈna tere, e faanahohia te tahi atu po no te Haapiiraa bibilia a te amuiraa apeehia e te hoê himene e te oreroraa parau taviniraa a te tiaau haaati. E hope te putuputuraa ma te hoê himene e pure.
6. Eaha te ohipa a te mau tiaau pǔpǔ?
6 Putuputuraa no te pororaa: E maiti te tino matahiapo i te mau tiaau pǔpǔ no te faanaho i te mau pǔpǔ no te pororaa e no te haapao i te taata taitahi o te pǔpǔ. Ia hinaarohia te hoê tavini tauturu no te rave i taua ohipa ra, e parauhia ïa oia te “tavini pǔpǔ.”
7. Eaha ta tatou e nehenehe e tiai e te porotarama apî o te mau putuputuraa a te amuiraa?
7 Ia au i teie mau haamaramaramaraa, e ravea ta tatou no te fanaˈo i te hoê arui tamaaraa pae varua o te haapii e o te faaitoito mai. E tauturu te reira ia tatou ia riro mai ei taata poro e haapii manuïa, faaineinehia no te hoê taviniraa o te hotu maitai aˈe.—Eph. 4:13, 14; Tim. 2, 3:17.
8. E nafea tatou e vetahi ê atoa e faufaahia ˈi ia faaineine oioi ia tatou?
8 E tauturu mai te faaineineraa i tera mau putuputuraa ia hiˈopoa maitai i te mau manaˈo faufaa haamahitihitihia i reira. E nehenehe tatou paatoa e pahono, ia mahanahana te tahi i te tahi atu. (Roma 1:11, 12; Heb. 10:24) Ta tatou fa, oia hoi ia ‘ite te taata atoa i to tatou tupuraa’ ma te ‘tufa ma te tia i te parau mau.’—Tim. 1, 4:15; Tim. 2, 2:15.
9. Eaha ta tatou faaotiraa, e no te aha?
9 Te oaoa nei tatou i teie mau tauiuiraa rahi o ta tatou mau putuputuraa o te hebedoma. Ia pee tatou paatoa i te aratairaa a “te tavini haapao maitai e te paari” e ia vai piri noâ tatou i to tatou Tiai mamoe Rahi o te faaineine ra ia tatou no te “ati” rahi e fatata roa maira.—Mat. 24:21, 45; Heb. 13:20, 21; Apo. 7:14.