E mea faufaa roa te haapiiraa bibilia taitahi e utuafare!
1. Eaha te haapeapearaa taa ê a te Tino aratai i teie nei taime, e no te aha hoi?
1 Mai i te senekele matamua, te haapeapea rahi nei te Tino aratai no te maitai o te nunaa o Iehova. (Ohi. 15:6, 28) A piri ai te ati rahi, e mea faufaa roa ia atuatu te feia poro i te Basileia atoa i te hoê taairaa puai e o Iehova. E nafea oe e faaohipa ˈi i te taime i faataahia na mua ˈˈe no te Haapiiraa buka a te amuiraa? Te faaitoitohia ra tatou paatoa ia faaohipa i tera taime no te haamoriraa utuafare. Ma te faaohipa i tera taime ma te paari, e nehenehe tatou e faahohonu atu â i te Parau faaurua a te Atua e e haafaufaa i ta te reira mau haapiiraa.—Sal. 1:1-3; Roma 11:33, 34.
2. Eaha te faaineine no te arui faataahia no te haamoriraa utuafare?
2 Haamoriraa arui utuafare: Te faaitoitohia ra te mau upoo utuafare ia amo i ta ratou hopoia i mua ia Iehova ia papu ia ratou e te ravehia ra te hoê porotarama haapiiraa bibilia utuafare tamau e te au. (Deut. 6:6, 7) E nehenehe te mau taeae e tuahine taa noa aita e hopoia utuafare e faaohipa i tera taime no te haapiiraa bibilia taitahi e no te rave i te mau maimiraa. E mea faufaa roa no tatou paatoa ia “faaherehere maite i te taime” no te haapiiraa e te feruriruriraa, no te tapea i te hoê taairaa puai e o Iehova noa ˈtu teie “anotau ino.”—Eph. 5:15, 16.
3, 4. Eaha te mau papai haapiiraa bibilia ta tatou e nehenehe e faaohipa, e ma teihea fa?
3 Hiˈopoa i te aha: E ite oe i roto i te Index des publications Watch Tower aore ra te CD-ROM Watchtower Library i te haamaramaramaraa o te tauturu ia oe ia fanaˈo i te mau taime haapiiraa bibilia au. E nehenehe te mau utuafare e hiˈopoa i te mau tumu parau o Te Pare Tiairaa, mai te mau tuhaa matauhia “Ravea faufaa e oaoa ˈi te utuafare,” “A haapii i ta oe mau tamarii,” e “No to tatou feia apî.” Te vai atoa ra i roto i te Réveillez-vous! te anairaa tumu parau “Te uiui nei te mau taurearea” e te mau tumu parau faahiahia no nia i te mau mea maere i poietehia.
4 E nehenehe te taioraa i te Bibilia ma te ore e ru e tapao i te mau faaueraa tumu a te Atua e ta ˈna mau haapiiraa i roto i te feruriraa e te aau o te utuafare taatoa. (Heb. 4:12) I te tahi atu mau taime, e nehenehe oe e mataitai e e tauaparau i nia i te hoê o te mau ripene tei tavirihia e te faanahonahoraa. E tia ia oe ia imi i te mau ravea atoa no te maiti eaha te hiˈopoa e e nafea ia hiˈopoa i te reira. No te aha e ore ai e ui i te mau melo o to oe utuafare i ta ratou e hinaaro e haapii?
5. No te aha e mea faufaa roa ˈi i teie nei te haapiiraa bibilia taitahi e utuafare?
5 No te aha e mea faufaa ˈi i teie nei: E faaineine te haapaariraa i to tatou taairaa e o Iehova ia tatou ia ‘parahi noa e ia hiˈo i te ora a Iehova.’ (Exo. 14:13) E hinaaro te mau metua i te aratairaa a te Atua no te aupuru i te mau tamarii “i rotopu i teie nei ui piˈo e mârô.” (Phil. 2:15) E hinaaro te mau tamarii i te tauturu no te faaruru i te tupuraa morare e ino noa ˈtura i te fare haapiiraa i teie nei mahana. (Mas. 22:3, 6) E mea maitai ia haapaari te feia faaipoipo i ta ratou “taura e toru fenu” e o Iehova. (Koh. 4:12) E faaohipa anaˈe ïa i te taime e toe nei ma te paari no te patu ia tatou iho i nia i to tatou “faaroo moˈa rahi”!—Iuda 20.