Te hoê haapapuraa o te faaroo!
1. Eaha te mau fifi e faaarepurepu i tohuhia e Iesu?
1 Ua faaroo maitai te mau aposetolo i ta Iesu mau parau no nia i to ˈna vairaa mai e te faaotiraa o te faanahoraa o te mau mea. E tupu te mau fifi e faaarepurepu i te huitaata nei—te tamaˈi, te oˈe, te aueueraa fenua, te maˈi pee. I muri iho, ua parau Iesu e e ririhia ta ˈna mau pǐpǐ, e pûpûhia no te pohe, e e taparahi-pohe-hia ratou. E tia mai te mau peropheta haavare e e haavare ratou e rave rahi. E iti te here o te taata e rave rahi.
2. No te aha e mea faahiahia ˈi e te porohia ra te parau apî maitai i te ao atoa nei?
2 I roto i teie huru tupuraa, ua maere paha te mau aposetolo i to Iesu parauraa e e porohia te parau apî maitai o te Basileia o te Atua e ati noa ˈˈe teie nei ao. (Mat. 24:3-14, MN) I teie mahana, te ite nei tatou i te tupuraa rahi o teie parau tohu faahiahia. Noa ˈtu e te ora ra tatou i te tau fifi mau, te poro ra te mau Ite no Iehova i te parau apî maitai ma te itoito rahi. A iti ai te here o te ao, e puai noa ˈtu â to tatou here. Noa ˈtu e te ririhia ra tatou e “te mau fenua atoa,” e nehenehe e parauhia e te poro nei tatou i te mau fenua atoa.
3. Eaha te mau numera faaitoito ta oe i ite i roto i te tapura o te ao atoa?
3 Auê te faaitoito ia hiˈopoa faahou i te ohipa ta te mau Ite no Iehova i rave i te roaraa o te matahiti taviniraa i mairi aˈenei, mai ta te tapura i te api 3 e tae atu i te api 6 e faaite ra! No te 16raa o te matahiti, ua ravehia hau atu i te hoê miria hora i roto i te ohipa pororaa e faariroraa i te taata ei pǐpǐ. E haapapuraa iho â te reira o te faaroo! E 5,8 % te faito maraaraa o te mau pionie, e 3,1 % no te mau taata poro, e e 4,4 % no te mau haapiiraa bibilia. Ua maraa te numera o te mau bapetizoraa i nia i te faito e 20,1 % ia faaauhia i te matahiti taviniraa i mahemo. E mea oaoa ia ite e fatata e hitu mirioni taata te tavini nei ia Iehova ma te haapao maitai—hau atu i te tahi noa ˈˈe tau o te tuatapaparaa o te taata nei! Eaha te mea ta oe i ite, a hiˈopoa ˈi oe i te tapura, o te faaitoito mau ra ia oe?
4. Eaha te mau fifi ta te hoê taata i tinai a tutava ˈi oia i te titau i te bapetizoraa?
4 Noa ˈtu e e numera faahiahia mau te reira, eiaha roa ˈtu e moe ia tatou e te faahohoˈa ra te reira i te feia o tei haapapu i to ratou faaroo. A rave na i te hoê hiˈoraa. Ua paari o Guillermo i Bolivia. Fanauhia i te matahiti 1935 ra, ua ohipa oia i roto i te hoê faaapu coca mai te 9raa o to ˈna matahiti. Mai to ˈna tamarii-rii-raa mai â, ua auau oia i te mau rauere coca no te tamǎrû i te fifi o te ohipa puai i te pae tino. I muri aˈe, ua inu hua oia i te ava e ua puhipuhi i te avaava. I to ˈna haamataraa i te haapii no nia i ta Iehova e titau ra ia ˈna, ua faaea Guillermo i te puhipuhi i te avaava e i te inu hua atoa i te ava. Te tautooraa rahi roa ˈˈe, o te faaea ïa i te auau i te mau rauere coca, peu ta ˈna i matau i te roaraa o to ˈna oraraa. Ua pure oia ma te tuutuu ore e ua tinai i tera peu. No te mea ua haapae oia i ta ˈna mau peu, ua bapetizohia oia. “I teie nei,” ta ˈna ïa e parau ra, “ua mâ vau e te oaoa roa nei au.”
5. Eaha to oe hinaaro?
5 Te anaanatae mau ra Iehova i te taata. Te hinaaro ra oia ia noaa paatoa te tatarahapa. (Pet. 2, 3:9) To tatou atoa ïa hinaaro. Ia nehenehe to tatou aau e turai ia tatou ia rave i te mau mea atoa no te tamau i te tauturu i te mau taata aau haavare ore ia ite e ia here ia Iehova mai ia tatou.