E tutava ˈtu â anaˈe i roto i ta tatou taviniraa
1 Ua aˈo te aposetolo Paulo i te mau Kerisetiano ia pee i te haerea e au ai i te Atua e ia ‘rahi atu â i te na reira.’ (Tes. 1, 4:1) Eaha ïa te auraa no tatou? Na mua, e mea titauhia ia tamau tatou i te imi i te mau ravea ia rahi atu â te ohipa i te pae varua, ma te tutava noa i te ‘rave faahope roa i ta tatou [taviniraa].’—Tim. 2, 4:5; MN.
2 Te manaˈo turai: Te turaihia ra tatou ia faarahi atu â i ta tatou taviniraa e to tatou hinaaro e tavini rahi atu â i to tatou Atua Poiete. Te hinaaro ra tatou e rahi mai i te pae varua e e imi i te mau ravea no te haamaitai i ta tatou taviniraa. E tauturu te hoê porotarama maitai ma te manaˈo turai e tano ia tatou ia raea te mau fa teotaratia.—Sal. 1:1, 2; Phil. 4:6; Heb. 10:24, 25.
3 E titau te ohiparaa i te faarahi atu â i ta tatou taviniraa ia atuatu tatou i te hoê feruriraa horoa noa, haapae ia tatou iho. E atuatuhia tera huru manaˈo na roto i te feruriruriraa i te hiˈoraa maitai roa o Iesu na roto i te pure. (Mat. 20:28) Ua oaoa rahi Iesu i te taviniraa ia vetahi ê i te roaraa o ta ˈna pororaa. (Ohi. 20:35) E nehenehe tatou e pee i te hiˈoraa o Iesu na roto i te faaiteraa i to tatou anaanatae i te taata e na roto i te tamoemoeraa i te mau taime maitatai ia rahi atu â ta tatou taviniraa.—Isa. 6:8, 9.
4 Te tuhaa a te mau metua: E nehenehe te hinaaro e tavini ia vetahi ê e e faarahi i ta tatou taviniraa e haapiihia i te mau tamarii i to ratou apîraa. E tapao te feia apî i te anaanatae o te mau melo o te utuafare e ta ratou ohipa-maite-raa i te faarahi i ta ratou taviniraa. Ua turaihia te hoê taeae ia na reira a vai apî noa ˈi oia no to ˈna raveraa e to ˈna papa ruau i te mau ohipa teotaratia. Ua turai te iteraa i te anaanatae e te oaoa o to ˈna papa ruau ia ˈna ia imi i te mau taime maitatai no te tavini i to ˈna mau taeae. E tavini tauturu oia i teie nei.
5 Te hinaarohia ra te mau taeae: “Ia hinaaro uˈana te hoê taata . . . , ua hinaaro oia i te ohipa maitai.” (Tim. 1, 3:1) E faaitoito teie mau parau i te mau taeae ia faaaravihi ia ratou no te mau hopoia rahi atu â i roto i te faanahonahoraa a Iehova. No te na reira eita e titauhia te mau aravihi taa ê. E tuu na mua te hoê taeae e titau ra i te Basileia i te parahiraa matamua e e faaitoito o ˈna i te ohipa i roto i te taviniraa. (Mat. 6:33; Tim. 2, 4:5; MN) E faaitoito oia i te riro ei hiˈoraa maitai no vetahi ê.
6 Na te ao atoa nei: Te haavitiviti ra Iehova i te haaputuputuraa. (Isa. 60:22) E mea ru ia faarahi atu â te feia atoa e pee ra i te hiˈoraa o Iesu, i ta ratou taviniraa. Te faaite ra te tapura na te ao atoa nei o te matahiti taviniraa 2006 e e 248 327 taata tei bapetizohia. Ua hau atu ïa i te 680 taata apî i te mahana hoê i te faito au noa! Ia tamau â ïa tatou i te imi i te mau ravea no te ohipa rahi atu â i roto i ta tatou taviniraa.