Te vai ra anei ta oe iho tuhaa fenua?
1. Eaha te auraa te hoê tuhaa fenua a te taata iho?
1 Na te taata poro iho te tuhaa fenua i horoahia ˈtu, ei hiˈoraa, e tuhaa fenua e nehenehe ai oia e haere oioi atu o ˈna anaˈe aore ra e te tahi atu taata poro. Tera râ, mai te peu e te vai ra ta oe iho tuhaa fenua no te ohipa i te tahi atu taime e nehenehe oe e horoa rahi roa i te faaiteraa, i roto iho â râ i te mau amuiraa e rave rahi roa tuhaa fenua.—Ohi. 10:42.
2. Eaha te tahi atu mau maitai mai te peu e e tuhaa fenua ta tatou iho?
2 Te mau maitai: Ua ite te tahi feia poro i te mau maitai hau ia poro i roto i ta ratou iho tuhaa fenua fatata i ta ratou vahi raveraa ohipa i te taime tamaaraa avatea aore ra i muri aˈe noa i te ohipa. Ua au te tahi atu i te ohipa-amui-raa ei utuafare na to ratou vahi hoê hora aore ra hou te Haapiiraa buka a te amuiraa. Ei faahopearaa, e itea mai ia ratou te feia o te farii i te hoê farerei-faahou-raa aore ra te hoê haapiiraa bibilia e eita ratou e haamâuˈa i to ratou itoito, taime e moni. Ma te faanaho maitai roa ˈˈe i te taime, ua nehenehe vetahi e riro ei pionie tauturu i te tahi taime, e e riro atoa ei pionie tamau. Hau atu â, na roto i ta ˈna iho tuhaa fenua, e nehenehe tatou e matau i te mau taata e faaea ra i reira, e tiaturi mai ratou ia tatou e e faatano tatou i ta tatou faaiteraa i ta ratou e tapitapi ra. E hotu atu â ïa ta tatou pororaa.
3. Eaha te tupuraa o te hoê pionie o tei rave i ta ˈna iho tuhaa fenua?
3 Te faatia ra te hoê tuahine pionie o tei faaitoitohia e te tiaau haaati ia rave i ta ˈna iho tuhaa fenua e: “Ua farii au i teie aˈoraa e aita i maoro ua matau maitai au i te mau taata o ta ˈu tuhaa fenua e ua maitai roa ˈˈe i nia ia ratou. Ua faaau vau i te taime o ta ˈu mau farerei-faahou-raa mai ta ratou e hinaaro. Ei faahopearaa: ua maraa ta ˈu mau farerei-faahou-raa mai te 5 e tae atu e 80 i roto hoê avaˈe, e e hitu haapiiraa bibilia i te fare ta ˈu.”
4. E nafea oe e fanaˈo ai e e ohipa ˈi i roto i ta oe iho tuhaa fenua?
4 E nafea ïa: Mai te peu e e hinaaro oe e ani i te hoê tuhaa fenua na oe iho, a parau atu i te taeae haapao tuhaa fenua. A ani roa i te tahi taata poro no te poro e o oe, e a papai maitai i te feia aita i te fare. A tutava i te rave roa i te tuhaa fenua e maha aˈe avaˈe. Mai te peu e mea fifi no oe, a ani i te tauturu i te tiaau o te haapiiraa buka aore ra i te tahi atu i roto i te amuiraa. Ia oti ia oe i te rave i te tuhaa fenua, e nehenehe oe e faahoˈi i te taatoaraa o te tuhaa fenua aore ra e ani e rave faahou i te reira. Tera râ, eiaha oe e tapea noa i te reira. E mea tia ia faahoˈi oe na te tahi atu feia poro. Mai te peu e to roto oe i te hoê amuiraa e mea taotiahia te tuhaa fenua e eita e noaa mai te hoê tuhaa fenua na oe iho, peneiaˈe e nehenehe oe e ani i te hoê tuhaa iti o te tuhaa fenua i te tiaau o ta oe haapiiraa buka.
5. E titauhia te aha no te rave i ta tatou ohipa e poro?
5 E hopoia faahiahia roa ta tatou ohipa e poro “i te mau fenua atoa.” (Mat. 24:14) E titau te reira i te faanaho-maitai-raa i te mau tutavaraa. Na roto i te pororaa eiaha noa ei pǔpǔ, i roto atoa râ i te hoê tuhaa fenua o tei horoahia mai, e nehenehe tatou e faaite i te parau apî maitai i te taata e rave rahi roa.