E hopoi mai te feruriraa horoa noa i te mau haamaitairaa
1. Mea nafea to Davida e to Nehemia faaiteraa i te hoê feruriraa horoa noa?
1 Ia Golia i aa i te nuu a Iseraela, ua nehenehe te faehau atoa e aro ia ˈna. Na te hoê râ tamaiti tiai mamoe, e ere i te mea aravihi no te tamaˈi, i pûpû ia ˈna. (Sam. 1, 17:32) I to te ati Iuda i faatîtîhia hoˈiraa i Ierusalema tera râ oreraa e manuïa i te patu faahou i te mau patu, na te hopoi auˈa a te arii Peresia i pûpû ia ˈna e vaiiho i to ˈna tiaraa hanahana i te aorai e e reva ˈtu ai oia i Ierusalema no te faanaho i te ohipa. (Neh. 2:5) Ua haamaitai Iehova i teie na tane e piti, ia Davida e ia Nehemia, no te huru feruriraa ta raua i faaite.—Sam. 1, 17:45, 50; Neh. 6:15, 16.
2. No te aha te mau Kerisetiano e titauhia ˈi ia faaite i te hoê feruriraa horoa noa?
2 I teie mahana, te ere ra te feruriraa horoa noa na te ao nei. I teie “anotau hopea,” e oraraa ohipa roa to te mau taata, e e rave rahi taata “miimii.” (Tim. 2, 3:1, 2) E mea ohie no te hoê taata ia haapao roa i to ˈna iho mau hinaaro a ore atu ai e tâuˈa i te mau taime maitatai no te pûpû i ta ˈna tauturu i te tahi atu mai te peu e te vai ra te hinaaro. Tera râ, ei Kerisetiano, e hinaaro tatou e pee ia Iesu, o tei rave i te taahiraa matamua no te tauturu i te tahi atu. (Ioa. 5:5-9; 13:12-15; Pet. 1, 2:21) E nafea tatou e nehenehe ai e faaite i te feruriraa horoa noa, e eaha te mau haamaitairaa ta tatou e fanaˈo?
3. E nafea te feruriraa horoa noa e turu ai i te mau putuputuraa a te amuiraa?
3 No to tatou mau taeae: E nehenehe tatou e tufa i te hoê “ô pae varua” na te tahi atu ia pahono ma te feruriraa horoa noa i te mau putuputuraa ia anihia i te feia e faaroo ra ia apiti. (Roma 1:11) Ma te mau pahonoraa o te faahanahana ia Iehova, e mau maite roa te parau mau i roto i to tatou feruriraa e aau, e e au roa ˈtu tatou i te mau putuputuraa. (Sal. 26:12) E nehenehe atoa tatou e pûpû ia tatou no te rave i te hoê tumu parau i te Haapiiraa o te taviniraa teotaratia ia hinaarohia te hoê mono. E tauturu te reira ia haamaitai atu â i to tatou aravihi i te haapii.
4. Eaha te tahi atu ravea e nehenehe ai tatou e faaite i te feruriraa horoa noa?
4 E nehenehe te mau taeae e faaite i te feruriraa horoa noa ma te hinaaro i te mau hopoia i roto i te amuiraa. (Isa. 32:2; Tim. 1, 3:1) E nehenehe te taatoaraa e tauturu e ia tere maitai te mau tairururaa na roto i te ohiparaa ma te feruriraa horoa noa i roto i te mau tuhaa rau. Ia pûpû tatou ia tatou iho no te poro e te tiaau haaati i roto i te taviniraa aore ra no te titau manihini ia ˈna e tamaa, ei faahopearaa “e mahanahana” mau tatou. (Roma 1:12) Ia pûpû tatou i te tauturu au i te mau tamarii aita e metua tane, te mau ivi, te feia maˈi aore ra te feia tino paruparu, te mau tuahine e tamarii apî ta ratou, e i te tahi atu i roto i te amuiraa, e ite tatou i te oaoa e te farii maitai a Iehova.—Mas. 19:17; Ohi. 20:35.
5. I roto i teihea ˈtu â tuhaa e titauhia ˈi te rima tauturu?
5 Te tahi atu ravea no te pûpû i to tatou taime e itoito o te apitiraa ïa i te tamâraa e te atuaturaa i te Piha a te Basileia. Hau atu â, i te mea e e rave rahi taata o te haere mai nei i roto i te parau mau, te vai ra te hinaaro rahi i te mau Piha a te Basileia apî e te mau rima tauturu no te patu i te reira. Ua haavata te tahi nau hoa faaipoipo ia raua no te tauturu i te Tomite paturaa no te fenua i ǒ raua noa ˈtu e e ere raua i te mea aravihi no te ohipa paturaa. A mairi ai te tau, ua faaineinehia nau hoa faaipoipo e i teie nei te ohipa nei raua ei taapi piriti. Teie ta te vahine i parau: “Ua faatupu te ohiparaa e te tahi atu i te auhoaraa piri roa. Ia hope te mahana, ua rohirohi mâua i te pae tino ua mahanahanahia râ i te pae varua.”
6. No te aha o te pororaa te ohipa tauturu te mea faufaa roa ˈˈe ta tatou e nehenehe e rave?
6 Ma te poro: Te ohipa tauturu faufaa roa ˈˈe ta tatou e nehenehe e rave i teie mahana o te ohipa pororaa ïa i te Basileia. A tauturuhia ˈi te taata ia taa e ia faaohipa i te aˈoraa bibilia, e noaa ia ratou te hoê fa i roto i te oraraa e te puai no te faaruru i te mau peu matauhia iino. E anaanataehia ratou i te tiaturiraa bibilia no te tau no a muri aˈe. Na roto i te pûpûraa i te haapiiraa bibilia, te rave ra tatou i te hoê taviniraa oaoa ma te feruriraa horoa noa ma te mau haamaitairaa maoro. (Ioa. 17:3; Tim. 1, 4:16) Peneiaˈe na roto i to tatou tupuraa e nehenehe tatou e ohipa ˈtu â i roto i te pororaa ma te rave i te taviniraa pionie tauturu aore ra tamau, ma te reva i te vahi e hinaarohia te tauturu aore ra ma te haapii i te tahi atu reo.
7. No te aha e mea faufaa iho â ˈi te feruriraa horoa noa i teie mahana?
7 Ua tohu te arii Davida e i te taime e haamata ˈi te Mesia i ta ˈna faatereraa, “e tia rahi roa” to te nunaa a te Atua. (Sal. 110:3) A faaoti oioi ai Iehova i te ootiraa hopea i te pae varua, e rave rahi roa ohipa e titauhia ˈi te rima tauturu. (Isa. 60:22) Ua parau anei oe e: “Teie au; o vau ta oe e tono”? (Isa. 6:9) Parau mau, ma te faaite i to tatou feruriraa horoa noa, e faaoaoa tatou ia Iehova e e ooti mai i te mau haamaitairaa rahi.