A tauturu i te tahi atu ia riro ei hoa no te Atua
1 I teie mahana, te haapiihia ra te mau taata no te mau nunaa atoa i te eˈa o Iehova. (Isa. 2:2, 3) Tera râ, no te ‘faahotu atu i te huero [ma te faaoromai],’ e titauhia ia here ratou ia Iehova. (Luka 8:15; MN; Mar. 12:30) Aita anaˈe taua here ra, eita ïa ratou e puaihia no te patoi i te mana ino aore ra e itoitohia no te rave i te mea maitai. Te tahi ravea no te tauturu i te tahi atu ia faatupu i te taairaa maitai e o Iehova o te faarahiraa ïa i to ratou hinaaro no to ˈna mau huru maitatai. A faaitoito ia ratou ia hiˈopoa maite i te mau haamaramaramaraa i roto i te buka E haafatata ˈtu ia Iehova.
2 To oe hiˈoraa: E nehenehe ta oe e rave ra e ohipa puai i nia i te aau o te mau piahi Bibilia. Ia ite ratou e mea faufaa roa no oe to oe auhoaraa e o Iehova e ia ite e te ohipa mau ra te reira i roto i to oe oraraa, e turaihia paha ratou ia atuatu i tera huru taairaa. (Luka 6:40) Oia mau, e pinepine e ohipa aˈe to tatou hiˈoraa i ta tatou e parau i nia i te tahi atu.
3 Te hoê ravea faufaa roa e haapii ai te mau metua i ta ratou mau tamarii ia here ia Iehova o to ratou ïa hiˈoraa. (Deut. 6:4-9) Ua ani te tahi nau hoa faaipoipo e hinaaro ra ia paari ta raua mau tamarii i roto i te parau mau i te aˈoraa i te mau metua i manuïa. “Te manaˈo tuea o te taatoaraa ta ˈu i paraparau atu o te hiˈoraa ïa o te mau metua,” ta te tane ïa i parau. No reira, na roto i to ratou huru oraraa taatoa, e nehenehe te mau metua e horoa na ta ratou mau tamarii i te hoê hiˈoraa oraora no nia i te auraa e riro ei ‘taua no te Atua.’—Iak. 2:23.
4 Te mau pure aau tae: E nehenehe atoa oe e tauturu i te tahi atu ia atuatu i te auhoaraa e o Iehova ma te haapii ia ratou ia pure ma to ratou aau. E faaite roa ˈtu paha oe ia ratou i te hohoˈa pure a Iesu, e te pure haavare ore e rave rahi i roto i te mau Papai. (Mat. 6:9, 10) E nehenehe oe e haapii i ta oe mau tamarii e piahi Bibilia e nafea ia pure ma te faaroo i ta oe iho mau pure. Ia faaroo ratou i ta oe mau parau aau tae, e taa ia ratou i to oe mau huru aau no Iehova. A faaitoito ia ratou ia “tamau uˈana maite â i te pure” ia faaruru ratou i te mau fifi. (Roma 12:12) A ite ai ratou i te tauturu a Iehova i te taime e hinaarohia ˈi, e haamata ratou i te tiaturi e i te here ia ˈna mai te hoê hoa mau.—Sal. 34:8; Phil. 4:6, 7.