Eaha ta oe e tuu na mua?
1 E nafea oe e pahono ai i tera uiraa? Parau mau, e hinaaro tatou atoa e tuu i te mau faufaa o te Basileia na mua. (Mat. 6:33) E mea tia râ ia ui tatou ia tatou iho, ‘Te faaite ra anei ta ˈu mau maitiraa e te na reira ra vau?’ Te faaitoito ra te Bibilia ia tatou: “E hiˈopoa maite ia outou iho.” (Kor. 2, 13:5) E nafea tatou e hiˈopoa ˈi ia tatou iho e te tuu ra tatou i te Basileia na mua?
2 To tatou taime: E nehenehe tatou e haamata ma te hiˈopoa e nafea tatou e maiti ai i te faaohipa i to tatou taime. (Eph. 5:15, 16) Ehia rahiraa taime ta oe e faaohipa ra no te amuimui, mataitai i te afata teata, faaohipa i te Internet, aore ra rave i te hoê ohipa auhia i te hebedoma taitahi? Ia papai tatou i te rahiraa taime e rave ai tatou i tera mau mea e ia faaau i te reira i te rahiraa taime no te mau ohipa pae varua, e maere paha tatou. Te rave ra anei tatou i te hora hau i te ohipa ma te ore e haapao i te taviniraa moˈa e te reira no te mau mea unauna noa? Ehia taime to tatou mairiraa i te mau putuputuraa aore ra te taviniraa no te faanaho i te mau tere faaanaanataeraa i te mau hopea hebedoma?
3 A haamau i te mau fa matamua: Aita to te rahiraa o tatou e taime au no te rave i te mau mea atoa ta tatou e hinaaro. No te tuu i te Basileia na mua, e titauhia ia faataa tatou i ta tatou mau fa matamua e ia faanaho i te taime no “te mau mea i hau i te maitai ra.” (Phil. 1:10) Te vai ra ïa te haapiiraa i te Parau a te Atua, te pororaa, te haapaoraa i to ˈna iho utuafare, e te apitiraa i te mau putuputuraa Kerisetiano. (Sal. 1:1, 2; Roma 10:13, 14; Tim. 1, 5:8; Heb. 10:24, 25) E mea maitai te tahi atu mau ohipa, mai te faaetaetaraa tino au e te faaanaanataeraa maitai. (Mar. 6:31; Tim. 1, 4:8) Tera râ e mea tia ia vaiihohia tera mau mea e ere i te mea faufaa roa i to ratou parahiraa.
4 Ua imi te hoê taeae apî i te tuu i te mau faufaa a te Basileia na mua ma te rave i te taviniraa taime taatoa eiaha râ ma te haere i te haapiiraa teitei no te faaineine i te hoê toroa a teie nei ao. Ua haapii o ˈna i te tahi atu reo e ua turaihia o ˈna ia tavini i te vahi e rahi aˈe te hinaaro. Ua parau o ˈna: “E taime faahiahia to ˈu i ǒ nei. E mea au mau te taviniraa! Te hinaaro noa nei au ia na reira atoa te mau taurearea atoa e ia ite i ta ˈu e ite nei. Aita e mea maitai roa ˈˈe maori râ te taviniraa ia Iehova ma te mau mea atoa e vai ra ia tatou.” Oia, e hopoi mai te tuuraa i te Basileia na mua i te mau haamaitairaa, tera râ te mea faufaa ˈtu â, e faaoaoa te reira i to tatou Metua i te raˈi o Iehova.—Heb. 6:10.