E faaite anaˈe i te anaanatae mau—ma te aau maitai
1 ‘E [aau] maitai to Iehova.’ (Sal. 145:8; MN) Noa ˈtu e o oia te Arii o te ao taatoa, mea aroha, mea haapao, e mea hamani maitai oia ia haa i nia i te mau taata tia ore. (Gen. 13:14; 19:18-21, 29) E nehenehe tatou e haamaitai i ta tatou faaiteraa i te parau apî maitai ma te pee i to tatou Atua aau maitai. (Kol. 4:6) Eita e navai noa ia ite i te peu e ia faatura i roto i ta tatou paraparau.
2 I tera fare i tera fare: E nafea tatou ia farerei tatou i te fatu fare i te hoê taime tano ore aore ra ua rahi roa ta ˈna ohipa no te paraparau mai? E mea maitai ia taa ia tatou tera mau tupuraa ma te haapoto roa i ta tatou faaiteraa aore ra ma te parau e hoˈi mai tatou i te tahi atu taime. Eiaha tatou e onoono maite i te taata ia farii i te mau papai mai te peu e eita ratou e hinaaro. E turai atoa te haapaoraa ia vetahi ê ia tatou ia faatura i to ratou aua na roto i te tapiriraa i te mau opani aua e fare, e te haamataroraa i ta tatou mau tamarii ia na reira atoa. E mea tia ia papu ia tatou e eita ta tatou mau papai atoa e itehia e te taata e haere ra na reira. Oia mau, e turai te aau maitai ia tatou ia haa i nia ia vetahi ê mai ta tatou e hinaaro e na reira atoa ratou i nia ia tatou.—Luka 6:31.
3 Pororaa na te mau aroâ: A poro ai tatou na te mau aroâ, e nehenehe tatou e faaite i te aau maitai ma te ore e haapeapea i te haereraa o te taata e ma te ore e putuputu i mua i te mau fare toa. E ara maitai tatou i te mau tupuraa o vetahi ê, ma te imi noa i te paraparau i te feia tau minuti ta ratou eiaha râ te feia e ru noa ra. I te tahi mau taime, e hinaaro paha tatou e paraparau puai ia faaroohia mai no te maniania o te aroâ. Ia na reira râ tatou ma te tura, ma te ore e huti i te ara-maite-raa i nia ia tatou iho e tia ˈi.—Mat. 12:19.
4 Pororaa na roto i te niuniu paraparau: E turai te haapaoraa ia vetahi ê ia tatou ia poro na roto i te niuniu paraparau i te hoê vahi maniania ore. E faaite tatou i te mau peu maitatai ia faahiti oioi tatou i to tatou iˈoa e ia faataa ˈtu i te tumu tatou e niuniu ai. E tauturu te tauaparau-roa-raa ˈtu i roto i te niuniu e te tapearaa i te hoê toparaa reo au noa ia ô mai vetahi ê i roto i te hoê aparauraa bibilia o te patu. (Kor. 1, 14:8, 9) Ma te aroha, te haapao, e te hamani maitai i roto i teie mau ravea rau, te pee ra tatou i to tatou Atua aau maitai ra o Iehova.