Te manaˈo ra anei oe i te mau taata matau?

Mai te peu e te faatere ra oe i te hoê haapiiraa bibilia i teie nei, no te aha e ore ai e ani i te piahi e ahiri e anaanatae atoa te tahi o to ˈna mau hoa, fetii, aore ra taata matau i te ite eaha ta te Bibilia e haapii ra? E pinepine, mea rahi te iˈoa e faahitihia. Ma te parau faatia a te piahi, e nehenehe oe e faahiti i to ˈna iˈoa ia farerei oe i taua mau taata ra no te pûpû atu i te hoê haapiiraa bibilia. E nehenehe oe e parau e, “Ua au o [Iˈoa o te piahi] i te haapii i te Bibilia, e ua manaˈo oia e e faufaa-atoa-hia paha oe i ta matou porotarama haapiiraa bibilia tamoni ore.” I muri iho, a faaite poto noa e nafea e faaterehia ˈi te haapiiraa, ma te faaohipa i te buka Bibilia haapii.

Mai te peu e e piahi ta oe o te haere maitai ra i mua, e nehenehe oe e faaitoito ia ˈna ia faataa ˈtu i te mau hoa e te mau melo utuafare o te anaanatae ra paha i te tereraa o te haapiiraa. E nehenehe oia e titau manihini ia ratou ia apiti i ta ˈna haapiiraa. Aore ra ia ore noa ˈtu e nahonaho, e nehenehe ta ˈna e faanaho e ia farerei oe ia ratou no te faaite i te tereraa o te haapiiraa. E faaitoito te na reiraraa i te piahi ia haamata i te tufa i te ite o te Bibilia na vetahi ê.

E nehenehe atoa paha te feia ta oe e farerei tamau ra e horoa mai i te mau iˈoa o te mau taata matau, noa ˈtu e aitâ ratou i farii atura i te haapiiraa bibilia tamau. Ia pûpû atu oe na ratou i te hoê buka Bibilia haapii, e nehenehe oe e ui noa ˈtu, “Ua matau anei oe i te hoê taata o te hinaaro e fanaˈo i teie buka?”

No te ru o te tau, e hinaaro tatou e faaohipa i te mau ravea atoa e nehenehe no te tauturu i te taata ia faaroo e ia farii i te parau apî maitai. Te manaˈo ra anei oe i te mau taata matau?