E faaite anaˈe i te anaanatae mau: ma te hamani maitai atu
1 Te faatia ra te hoê vahine, tei faahapa i te mau Ite no Iehova na mua ˈˈe, i to ˈna farerei-matamua-raa i te hoê o ratou: “Aita vau e haamanaˈo maitai ra eaha ta mâua i paraparau, ta ˈu râ e haamanaˈo ra, to ˈna ïa maitai i nia ia ˈu, to ˈna farii maitai e to ˈna haehaa. Ua au roa vau i to ˈna huru.” Te haapapu ra teie tatararaa i te faufaaraa ia anaanatae roa ˈtu mau â i te feia ta tatou e poro.—Phil. 2:4.
2 Mea hamani maitai te aroha: E nehenehe tatou e faaite i to tatou here ia vetahi ê ma te hamani maitai atu. (Kor. 1, 13:4) E anaanatae roa te hoê taata î i te hamani maitai i te maitai o vetahi ê, e imi hoi oia i te horoa ˈtu i te tauturu mau. Parau mau, e ohipa hamani maitai iho â te pororaa. E ite-atoa-hia râ to tatou anaanatae mau eiaha noa i roto i te pororaa. Na to tatou huru i nia i te taata, oia hoi to tatou maitai, ta tatou mau peu maitatai, ta tatou huru faarooraa, ta tatou e parau, e nafea tatou ia parau, to tatou atoa hohoˈa mata e faaite i to tatou tapitapi mau ia ratou.—Mat. 8:2, 3.
3 E turai atoa to tatou anaanatae î i te here i to tatou taata-tupu, ia tatou ia pûpû atu i te tauturu. A poro ai oia i tera uputa i tera uputa, ua tiahi-oioi-hia te hoê pionie e te hoê vahine ivi ruhiruhia i to ˈna iho â iteraa e e Ite o ˈna. Ua faataa ˈtu te ruhiruhia e i te taime a pate ai oia i te ôe, to nia iho oia i te eˈa paiumaraa e tamata ra i te taui i te mori. “Mea atâta no oe ia rave i tena mea o oe anaˈe,” ta te taeae ïa i parau. Ua faatomo maira oia ia ˈna i roto. Ua taui oia i te mori e reva ˈtura. I muri iti aˈe, i to te tamaiti a taua vahine ra haereraa ˈtu e hiˈo ia ˈna, ua faatia oia i te ohipa i tupu. No to ˈna maere, ua hinaaro oia e haamauruuru i te taeae. Ua aparau maitai raua, e ua farii te tamaiti i te haapii i te Bibilia.
4 Na roto i to tatou hamani maitai e faaite ai tatou i to Iehova here i te taata e e faanehenehe ai tatou i te poroi o te Basileia. No reira, ‘e faaite hua noa anaˈe tatou ia tatou iho ei rave ohipa na te Atua ma te hamani maitai.’—Kor. 2, 6:4, 6.