E parau noa anaˈe i te parau a te Atua ma te mǎtaˈu ore
1 Ua ite te mau tavini Kerisetiano e e ere pauroa o te farii i ta ratou pororaa. (Mat. 10:14) Noa ˈtu te huru au ore o te tahi mau taata, eita tatou e faaea i te faaite i te parau apî maitai. (Mas. 29:25) Eaha te tauturu ia tatou ia parau noa i te parau a te Atua ma te mǎtaˈu ore?
2 Ua taa i te aposetolo Paulo ‘te maitai rahi o te ite i te Mesia ia Iesu.’ Ua turai te reira ia ˈna ia paraparau ma “te ite papu.” (Phil. 3:8; Tes. 1, 1:5) Noa ˈtu e ua hiˈo vetahi i te poroi ta ˈna e poro ra ei mea paruparu e te maamaa, ua ite Paulo e te parau apî maitai ‘o te mana mau ïa o te Atua ia ora te feia atoa i faaroo ra.’ (Roma 1:16) No reira, i mua atoa i te patoiraa, ua ‘parau noa oia i te parau a te Fatu ra o Iehova ma te mǎtaˈu ore.’—Ohi. 14:1-7; 20:18-21, 24.
3 Te tumu o to tatou puai: E ere maoti to ˈna iho puai i tia ˈi ia Paulo ia poro ma te mǎtaˈu ore. Teie ta Paulo i papai no nia ia ˈna iho e ia Sila: “Pohe noâ matou i mutaa iho, e te hamani-ino-rahi-hia mai i Philipi ra, i itoito â matou i to matou Atua, i te parauraa ˈtu ia outou i te evanelia a te Atua, i roto â i te mârô rahi ra.” (Tes. 1, 2:2; Ohi. 16:12, 37) Hau atu â, a tapeahia ˈi oia i Roma, ua ani Paulo ia pure vetahi ê no ˈna ia tia ia ˈna ia faaite noa i te parau apî maitai ‘ma te itoito, te au ia ˈna ia parau ra.’ (Eph. 6:18-20) Ma te tiaturi ia Iehova eiaha ia ˈna iho, ua tia ia Paulo ia parau noa i te parau a te Atua ma te mǎtaˈu ore.—Kor. 2, 4:7; Phil. 4:13, MN.
4 Hoê â huru i teie tau. Ua pure te hoê taeae e mea fifi roa no ˈna ia faaite e e Ite no Iehova oia i ta ˈna vahi raveraa ohipa e ia poro ma te faanaho ore, no nia i te reira e ua tamata ˈtura. Ua farii te hoê o to ˈna mau hoa, tei patoi na i te omuaraa, i te haapii i te Bibilia i muri aˈe i to te taeae faaiteraa ˈtu i te tiaturiraa o te tia-faahou-raa. Mai reira mai, ua faaohipa te taeae i te mau taime maitatai atoa no te poro. I muri aˈe i to ˈna tauiraa i te ohipa, ua tauturu oia e 34 taata i ta ˈna vahi raveraa ohipa apî ia haere i mua e tae roa i te bapetizoraa i te roaraa 14 matahiti. E nehenehe tatou e tiaturi e e haapuai atoa Iehova ia tatou ia ‘parau noa i ta ˈna parau ma te mǎtaˈu ore.’—Ohi. 4:29.