Tuhaa 8: E faatere anaˈe i te mau haapiiraa bibilia o te paturu i te mau haereraa i mua
E aratai anaˈe i te mau piahi i te faanahonahoraa a Iehova
1. No te aha e mea maitai ai ia faaite i te hoê manaˈo no nia i te faanahonahoraa a Iehova i te hebedoma taitahi i te roaraa o te hoê haapiiraa bibilia?
1 Ia faatere tatou i te mau haapiiraa bibilia, ta tatou fa e ere noa no te faaite i te mau haapiiraa tumu, no te tauturu atoa râ i te mau piahi ia riro ei melo o te amuiraa Kerisetiano. (Zek. 8:23) E nehenehe te buka rairai Les Témoins de Jéhovah: Qui sont-ils? Quelles sont leurs croyances? e tauturu ia tatou ia na reira. A vaiiho i te hoê buka rairai na te feia e haamata ra i te haapii i te Bibilia e a faaitoito ia ratou ia taio atu. Hau atu â, i te hebedoma taitahi, a rave tau minuti i te roaraa o te haapiiraa no te faaite i te hoê manaˈo no nia i te faanahonahoraa a Iehova.
2. E nafea outou e nehenehe ai e tauturu i te mau piahi Bibilia ia apiti i te mau putuputuraa a te amuiraa?
2 Te mau putuputuraa a te amuiraa: Te ravea matamua roa e au ai te mau piahi Bibilia i te faanahonahoraa a te Atua o te apitiraa mai ïa ia tatou i te mau putuputuraa a te amuiraa. (Kor. 1, 14:24, 25) No reira, e nehenehe outou e haamata i te haamaramarama ma te faataa ˈtu na putuputuraa e pae o te hebedoma, hoê putuputuraa i te taime hoê. A faaite atu ia ratou i te upoo parau o te oreroraa parau no te taatoaraa i mua. A faaite ia ratou i te tumu parau e hiˈopoahia i te haapiiraa o Te Pare Tiairaa e i te haapiiraa buka a te amuiraa. A faataa i te tereraa o te Haapiiraa o te taviniraa teotaratia e te Putuputuraa no te taviniraa. Mai te peu e e tumu parau ta outou i te haapiiraa, peneiaˈe e nehenehe outou e faahiti faahou i te reira e o ratou? A faaite ia ratou i te mau manaˈo faufaa i faahitihia i te roaraa o te mau putuputuraa. A faaohipa i te mau hohoˈa i roto i ta tatou mau papai no te tauturu ia ratou ia ite i te ohipa e tupu ra. Mai te haapiiraa matamua roa iho â, a titau manihini ia ratou ia apiti i te mau putuputuraa.
3. Eaha te mau tuhaa o te faanahonahoraa ta tatou e nehenehe e tauaparau?
3 Ia fatata mai te Oroa haamanaˈoraa, te mau tairururaa e te tere o te tiaau haaati, a rave tau minuti no te faataa e no te faatupu i te anaanatae o te piahi no tera mau faanahoraa. A pahono riirii i te mau uiraa mai teie: No te aha tatou e amo ai te iˈoa Ite no Iehova? No te aha tatou e parau ai i ta tatou vahi putuputuraa ei mau Piha a te Basileia? Eaha te hopoia a te mau matahiapo e te mau tavini tauturu? Mea nafea te faanahoraahia te ohipa pororaa e te tuhaa fenua? Mea nafea te neneiraahia ta tatou mau papai? Mea nafea te tururaahia te faanahonahoraa a Iehova i te pae moni? Eaha te ohipa a te piha a te amaa e te Tino aratai i roto i te tiaauraa i te ohipa?
4, 5. E nafea ta tatou mau video e nehenehe ai e faatupu i te mauruuru no te faanahonahoraa a Iehova?
4 Te mau video o te haapii mai: E ravea ê atu ta tatou mau video e nehenehe ai te mau piahi Bibilia e ite i te faanahonahoraa faahiahia a Iehova. Te faaite ra te video Jusquˈaux extrémités de la terre i ta tatou ohipa pororaa na te ao nei; te faaite ra te video Toute la communauté des frères i to tatou fetii taeae na te ao nei; e te faaite ra te video Unis grâce à l’enseignement divin i te auhoêraa o te mau Ite no Iehova. Ia ˈna i mataitai i te video Les Témoins de Jéhovah: un nom, une organisation, ua tahe te roimata o te hoê vahine o tei rave na i ta tatou mau vea e te tahi atu mau papai e pae matahiti i teie nei. Ua haamata o ˈna i te tiaturi i te mau Ite o te farerei ia ˈna, i muri aˈe râ i te mataitairaa i te video, ua itea mai ia ˈna e e nehenehe atoa ta ˈna e tiaturi i te faanahonahoraa a Iehova. Ua haamata o ˈna i te haapii, e i te hebedoma i muri iho ua apiti o ˈna i te mau putuputuraa i te Piha a te Basileia.
5 Ma te tauaparau tau minuti i te hebedoma taitahi e ta tatou mau piahi e ma te faaohipa i te mau mauhaa e vai ra ia tatou, e nehenehe tatou e aratai riirii i te mau piahi Bibilia i te faanahonahoraa anaˈe ta Iehova e faaohipa ra i teie mahana.