E nehenehe anei outou e toro i to outou rima tauturu?

¹ Te imi noa ra Iehova i te mau ravea no te tauturu i ta ˈna mau tavini haapao maitai. (Par. 2, 16:9; Isa. 41:10, 13) Ma te faaau i te Atua i te hoê tiai mamoe tei aroha noa, ua papai Isaia e: “E haaputu oia i te mau fanauˈa rii i roto i tana rima, e ei roto ratou i tana ouma ia hopoi; e aratai rii maite oia i te mau maiaa faaote pinia ra.” (Isa. 40:11) E hiˈo anaˈe i te tahi mau ravea ta tatou e nehenehe e pee no nia i te aupuru î i te here o Iehova.

² E tauturu anaˈe i te feia tae apî mai: E nehenehe tatou e toro i te rima tauturu ma te titau manihini i te feia tae apî mai ia oaoa i te amuimuiraa maitai e o tatou. (Mas. 13:20) Te haamanaˈo ra te hoê taeae i te tauturu ta ˈna i fanaˈo i to ˈna haamataraa i te amui e te amuiraa, ua parau oia e: “E rave rahi taime, ua faaô te hoê utuafare fetii ia ˈu i roto i ta ratou haapiiraa utuafare. A haere noa ˈi au i mua, ua titau manihini tamau noa mai na hoa pionie faaipoipo apî ia ˈu ia poro i te mau mahana taatoa e o raua. Ua fanaˈo noa matou i te mau aparauraa pae varua maitai.” Ua na ô faahou oia e: “Na mua ˈˈe au i riro mai ai ei Kerisetiano, ua matau na vau i te ori i te mau po Mahana pae e Mahana maa atoa. Ua haamâha ïa te taime ta ˈu i rave na e to ˈu mau taeae i to ˈu hiaai e amuimui.” Maoti te anaanatae î i te here o te amuiraa, ua aˈa-maitai-hia teie taeae i roto i te faaroo, e e melo oia i teie nei no te fetii o te Betela.—Kol. 2:6, 7.

³ E patu anaˈe te tahi i te tahi: E nehenehe paha tatou e haroaroa i te taime tano no te toro i te rima tauturu ia faaû anaˈe to tatou mau taeae i te mau tupuraa fifi. E nehenehe anei tatou e faanaho no te pororaa na roto i te niuniu na muri i te hoê taata poro tino paruparu, aore ra e titau manihini ia ˈna ia apee ia tatou no te hoê haapiiraa bibilia, peneiaˈe ma te afai mai i te piahi i to ˈna fare? Te hinaaro ra anei te hoê metua tane aore ra vahine i te tauturu no te haapao i ta ˈna mau tamarii apî i roto i te taviniraa? Te vai ra anei te feia aau taiâ aore ra mamahu o te oaoa ia tauturu atu tatou ia ratou i roto i te mau farerei-faahou-raa aore ra no te rave i te tahi atu huru pororaa? E turai te anaanatae î i te here no to tatou mau taeae ia imi tatou i te mau ravea no te patu ia ratou.—Roma 14:19.

⁴ A pee ai tatou i te haapao maitai î i te here o Iehova no ta ˈna mau tavini, e haapuai tatou te tahi i te tahi, e tauturu tatou i te amuiraa ia faaite i te here, e e faahanahana tatou i to tatou Metua i te raˈi.—Eph. 4:16.