E haamanaˈo anaˈe e tau ru teie!
1 A vai ai oia i te fenua nei, ua ite Iesu e mea taotiahia te taime e vai ra ia ˈna no te rave i te ohipa a to ˈna Metua. (Ioa. 9:4) No reira, ua rave oia i ta ˈna taviniraa ma te haamanaˈo e tau ru teie, e ua faaineine oia i ta ˈna mau pǐpǐ ia na reira atoa i te feruri. (Luka 4:42-44; 8:1; 10:2-4) Ua tuu oia i te mau faufaa materia i te piti o te parahiraa. (Mat. 8:20) Mea na reira oia i nehenehe ai e faaoti i te ohipa ta Iehova i horoa na ˈna e rave.—Ioa. 17:4.
2 Te hoê taime taotiahia: E mea taotia-atoa-hia te taime e vai ra ia tatou no te poro i te parau apî maitai “e ati noa ˈˈe teie nei ao.” (Mat. 24:14) Te faaite ra te mau parau tohu bibilia e te ora nei tatou i te tau hopea mau. Fatata ‘te feia aore i ite i te Atua, e tei ore i faaroo i te evanelia o to tatou Fatu o Iesu i te faautuahia mai i te pohe mure ore.’ (Tes. 2, 1:6-9) E tupu taue mai taua haavaraa ra ma te manaˈo-ore-hia. (Luka 21:34, 35; Tes. 1, 5:2, 3) E titauhia ia faaarahia taua tupuraa atâta ra i te taata. E hopoia na tatou te tautururaa ia ratou ia imi i te farii maitai a Iehova a vai noa ˈi te taime.—Zeph. 2:2, 3.
3 E rave anaˈe i tei maraa ia tatou: Ma te ite e “te poto nei te taime,” te tuu nei te mau tavini a te Atua i te pororaa na mua roa. (Kor. 1, 7:29-31; Mat. 6:33) Ua haapae vetahi i te tahi mau maitai i te pae faaravairaa faufaa aore ra i te tahi mau tapiraa no ratou iho no te apiti rahi atu â i roto i te taviniraa. (Mar. 10:29, 30) Te tamau ra te tahi atu e “ia rahi â te rave i te ohipa a te Fatu” noa ˈtu te mau tamataraa. (Kor. 1, 15:58) Ua faaite na e rave rahi i te parau apî maitai “ma te aueue ore” tau ahuru matahiti i te maoro. (Heb. 10:23) E haafaufaa rahi Iehova i tera mau haapaeraa atoa no te turu i te mau faufaa a te Basileia.—Heb. 6:10.
4 E tauturu te haamauraa tatou i to tatou oraraa i nia i te haamoriraa ia Iehova, tae noa ˈtu i nia i te ohipa pororaa, ia haamanaˈo noa tatou i te mahana o Iehova. Hau atu â, e paruru te reira ia ore tatou ia hema i te ao a Satani e e haapaari i ta tatou faaotiraa e tapea i te haerea moˈa. (Pet. 2, 3:11-14) Oia mau, e riro te raveraa i ta tatou taviniraa ma te haamanaˈo e tau ru teie ei ravea e ora ˈi tatou iho e te feia atoa e faaroo mai ia tatou.—Tim. 1, 4:16.