E nafea ia tauturu i te mau hoa faaipoipo e ere i te Ite?

¹ E rave rahi tavini a Iehova e mea maitai to ratou hoa faaipoipo i nia i te mau Ite, o te anaanatae ra i te oraraa o te amuiraa, aita râ e faaoti ra e riro ei tavini na te Atua. Ua faˈi te hoê tane faaipoipo e ere i te Ite i mutaaiho e: “Ua riro te manaˈo e haere i tera fare i tera fare ei haafifiraa rahi no ˈu.” E titauhia paha ia faarue te tahi atu i te tahi mau peu aita to roto i te mau Papai, aore ra te manaˈo nei ratou e eita roa ˈtu ratou e nehenehe e pee i te porotarama teotaratia î a to ratou hoa faaipoipo. E nafea ia tauturu ia ratou?

² E anaanatae anaˈe ia ratou: Ia anaanatae tatou ia ratou e ia taa tatou i to ratou tapitapi, peneiaˈe e farii ohie aˈe ratou i te parau mau bibilia. (Phil. 2:4) Te faataa pinepine nei te mau hoa faaipoipo tei riro ei Ite e no te anaanatae î i te here o tei faaitehia ˈtu i putapû ai ratou. “Ua anaanatae taa ê o José te hoê matahiapo o te amuiraa ia ˈu,” ta te tane faaipoipo faahitihia aˈenei ïa e faatia ra. “Te manaˈo nei au e auaa ta ˈna mau faaitoitoraa i haapii maite ai au i te pae hopea.” Te haamanaˈo ra te tahi atu e i tutava na te mau taeae o tei farerei ia ˈna i te faahiti i te mau tumu parau ta ˈna e au. “Ua haamata ˈtura vau i te hiˈo i te faaroo o [ta ˈu vahine] ma te hoê huru taa ê roa,” ta ˈna ïa i parau. “E feia maramarama roa to ˈna mau hoa o te nehenehe e aparau i te mau tumu parau huru rau.”—Kor. 1, 9:20-23.

³ E horoa ˈtu anaˈe i te hoê tauturu mau: E nehenehe atoa te mau hoa faaipoipo e ere i te Ite e putapû i ta tatou tauturu î i te here. (Mas. 3:27; Gal. 6:10) I te hoê mahana, ua ino te pereoo o te hoê tane faaipoipo tiaturi ore, e na te hoê taurearea Ite i tauturu ia ˈna. “Ua maere roa vau,” ta ˈna ïa e haamanaˈo ra. Ua tauturu te tahi atu taeae i te tane a te hoê tuahine i te hoê mahana taatoa i te aua i to ˈna fenua. Ma te ohipa e te aparau amui, ua riro raua ei hoa. E piti hebedoma i muri aˈe, ua haere tera taata e hiˈo i te taeae e ua parau ia ˈna e: “Ua tae i te taime e rave ai au i te tauiraa i roto i to ˈu oraraa. E hinaaro anei oe e haapii i te Bibilia e o vau?” I muri aˈe i to ˈna haere-oioi-raa i mua, ua bapetizohia o ˈna.

⁴ A imi ai i te mau taata e au i te parau apî maitai i roto i ta tatou tuhaa fenua, e tamau anaˈe i te tauturu i te mau hoa faaipoipo e ere i te Ite o to tatou mau hoa Kerisetiano.—Tim. 1, 2:1-4.