“Ia parahi ineine noa outou”
1 I roto i ta ˈna parau tohu rahi no nia i te hopea o teie faanahoraa o te mau mea, ua faaara Iesu: eiaha ia haapao noa i te mau haapeapearaa o te oraraa o teie ao. (Mat. 24:36-39; Luka 21:34-35) I te mea e e nehenehe te ati rahi e tupu i te mau taime atoa, e mea titauhia ia haapao tatou i te aˈoraa a Iesu: “Ia parahi ineine noa outou; ei te hora manaˈo-ore-hia e outou na e tae mai ai te Tamaiti a te taata nei.” (Mat. 24:44) Eaha te tauturu ia tatou ia vai ineine noa?
2 E ara anaˈe i te mau haapeapearaa e faanevanevaraa: O “te peapea o teie nei ao” te hoê o te mau marei i te pae varua e mea tia ia ara tatou. (Luka 21:34) I te tahi mau fenua, e haafifi te veve, te ohipa ore e te moni rahi o te oraraa ia noaa mai te mau mea faufaa no te ora. I te tahi atu, e mea matauhia te titauraa i te mau maitai materia. Mai te peu e e haamata tatou i te haapeapea no te mau mea materia noa, e nehenehe tatou e haamoe i te mau ohipa mau a te Basileia. (Mat. 6:19-24, 31-33) E tauturu mai te mau putuputuraa Kerisetiano ia tapea i to tatou feruriraa i nia i taua mau ohipa mau ra. E fa anei na outou te taeraa mai i te mau putuputuraa atoa?—Heb. 10:24, 25.
3 Ua î te ao i te mau faanevanevaraa o te nehenehe e eiâ ohie i to tatou taime faufaa. E riro te faaohiparaa i te roro uira ei marei mai te peu e e pau rahi roa te taime o te taata ia faahee i nia i te Internet, ia taio e ia faareva i te mau rata, aore ra ia hauti i te mau hauti video. E nehenehe te taime e pau rahi ia mataitai i te afata teata aore ra i te mau hohoˈa teata, ia rave i te mau ohipa au-roa-hia, ia taio i te mau papai a teie ao aore ra i te tuaro, a vaiiho mai ai maa taime iti aore ra itoito no te mau ohipa pae varua. Noa ˈtu e e pûpû mai te faaanaanataeraa e te faafaaearaa i te tamǎrûraa taime poto, e horoa mai te haapiiraa bibilia, taitahi e utuafare, i te mau maitai mure ore. (Tim. 1, 4:7, 8) E faaherehere anei outou i te taime no te feruriruri i te Parau a te Atua i te mahana taitahi?—Eph. 5:15-17.
4 E mauruuru rahi tatou e ua faanaho te faanahonahoraa a Iehova i te hoê porotarama haapiiraa pae varua no te tauturu ia tatou ‘ia au ia tatou te ora i te mau mea iino e fatata mai nei, e ia tia maite tatou i mua i te aro o te Tamaiti a te taata nei’! (Luka 21:36) Ia faaohipa hope ïa tatou i taua mau faanahoraa ra e “ia parahi ineine noa,” ia riro hoi to tatou faaroo “ei haamaitai, e ei tura, e ei maitai, i te faraa mai o Iesu Mesia ra”!—Pet. 1, 1:7.