Te haapiiraa i te buka Adorez Dieu

Ua neneihia te buka Adorez le seul vrai Dieu e ia haapiihia e te feia tae apî mai i muri aˈe i to ratou hiˈopoaraa i te buka Ite. E faaineine to tatou faahohonuraa i teie papai i te haapiiraa buka a te amuiraa ia tatou ia faaohipa i teie mauhaa i roto i te taviniraa e e tauturu ia tatou ia faarahi atu â i to tatou here e mauruuru no Iehova e no ta ˈna faanahonahoraa. E nafea tatou e faufaa-roa-hia ˈi i to tatou haapiiraa i te buka Adorez Dieu?

Te aratairaa i te haapiiraa: I te mea e e hiˈopoa tatou hoê pene taatoa i te hebedoma taitahi, e mea tia ia tufa te mau tiaau no te haapiiraa buka i te taime ma te paari. E ara ratou eiaha e faataere i nia i te mau paratarafa matamua, ia vaiiho i te taime rahi aˈe no te mau manaˈo faufaa ˈtu â e farerei-pinepine-hia i muri aˈe i roto i te pene. E tauturu te hoê tauaparauraa poto i nia i te mau uiraa o te haamanaˈoraa i te pae hopea o te haapiiraa taitahi i te feia i tae mai ia mehara i te mau manaˈo faufaa.

Fatata i roto i te afaraa o te mau pene o te buka Adorez Dieu te vai ra te mau tuhaa no te feruriruriraa e te tauaparauraa hau. E itea vetahi mau hiˈoraa i te api 48. Eita e titauhia ia taio i taua mau uiraa ra. Ia hiˈopoahia te reira e te pǔpǔ, e rave te tiaau e ia taiohia e ia tatarahia te mau irava i faahitihia, mai te peu e e taimehia.

Te faaineineraa: No te faaineine maitai i te haapiiraa, eita e navai te reni-noa-raa i te mau pahonoraa. E nehenehe te feruriruriraa ma te aau tae i te mau irava i faahitihia e faaineine eiaha noa i ta tatou mau pahonoraa, hau atu â râ, i to tatou mafatu. (Eze. 7:10) E nehenehe tatou paatoa e faaitoito te tahi i te tahi ma te horoa au noa i ta tatou mau pahonoraa.—Roma 1:11, 12.

E tauturu to tatou haapiiraa i te buka Adorez Dieu ia tatou ia haafatata ˈtu ia Iehova e e faaineine ia tatou ia haapao i te feia aau tia ia amui mai ia tatou no te haamori ia ˈna. (Sal. 95:6; Iak. 4:8) Ia faufaa-roa-hia ïa tatou paatoa i taua mau faanahoraa maitatai pae varua ra!