Tairururaa haaati: te porotarama apî
1 Ua faaite atea to tatou Fatu e e farerei ta ˈna mau pǐpǐ i te pohe. (Mat. 24:9) E nafea tatou ia hiˈo i te mau tamataraa, e tia ˈi? Eaha te tauturu ia tatou ia faaruru atu? E pahono te porotarama o te tairururaa haaati o te matahiti taviniraa 2004 i taua mau uiraa ra. Teie te manaˈo tumu o taua tairururaa ra: “E oaoa i te tiairaa; e faaoromai i te pohe.”—Roma 12:12.
2 E piti oreroraa parau e maha tuhaa: E faahiti te oreroraa parau matamua “E faahotu anaˈe i te huero ma te faaoromai,” i te mau tuhaa i reira tatou e faahotu ai. E uiuihia e rave rahi feia poro no nia i te mau ravea ta ratou e faaohipa ra no te poro e no te haapii, ma te ite papu i te ru o taua ohipa ra. E hinaaro te mau metua e feruri taa ê i te tuhaa ra “Ia aˈohia tatou e Iehova,” e faataa e nafea te mau metua e nehenehe ai e haaferuri e ta ratou mau tamarii. E huti te taeae orero o te horoa i te tuhaa hopea o taua oreroraa parau ra i te ara-maite-raa i nia i te titauhia ia tatou ia rave ia ore teie ao e faaô mai i roto ia tatou a ore atu ai tatou e hotu.—Mar. 4:19.
3 Teie te manaˈo tumu o te piti o te oreroraa parau e maha tuhaa “E horo tamau maite anaˈe i te hororaa.” E faaite te reira i te tumu e au ai to tatou oraraa i te hoê hororaa. No te aha e mea tia ˈi ia horo tatou ia au i te mau faatureraa? E nafea tatou e manuïa ˈi i te haapae i te mau mea teimaha atoa a horo tamau maite atu ai i teie hororaa no te ora ma te toaruaru ore? E tauturu mai te mau aˈoraa bibilia tano maitai e horoahia ia tamau maite i te horo.
4 E hopoi mai te faaoromai i te farii maitai a Iehova: E haapaari te mau oreroraa parau e vauvauhia na te mau tiaau ratere i te faaroo o te feia e aapo i te mau aˈoraa e horoahia e e faaohipa ˈtu. Teie te manaˈo tumu o te hoê o te mau oreroraa parau vauvauhia na te tiaau mataeinaa “E faatupu te faaoromai i te tiaraa fariihia.” E pahono te oreroraa parau no te taatoaraa i teie mau uiraa: Ia tiai te mau nunaa i to vai iˈoa e tia ˈi? Eaha to te reira auraa? E haamahitihiti te oreroraa parau hopea, “E ora outou i te faaoromai,” i tei tauturu ia Iesu ia faaoromai i te parau-tia ore ma te ore e inoino.
5 Eiaha e haamoe i te afai mai i ta outou buka École du ministère e Te Pare Tiairaa faataahia no te hebedoma. E tauturu te mau tapaopaoraa ia outou ia haamau i to outou feruriraa; e nehenehe outou e hiˈo atu i muri aˈe, i te taime iho â râ e hiˈopoa faahou ai ta outou amuiraa i te mau tumu parau i vauvauhia i te tairururaa.
6 Na Iehova iho i faaineine i teie oroa amuraa maa pae varua. A haere mai e a tamaa! E pii hua tatou i te oaoa ia apee tatou i te porotarama taatoa.—Isa. 65:14.