E parau mau te Parau a te Atua
1. Eaha te mau haamaramaramaraa faufaa e vai ra i roto i te Bibilia?
1 “E parau mau ta oe,” ta te fatu salamo ïa i papai. (Sal. 119:160) Maoti ta ˈna Parau faauruahia, te horoa ra o Iehova i te mau pahonoraa mauruuru i te mau uiraa faufaa roa ˈˈe o te oraraa. Te pûpû ra o ˈna i te tamahanahanaraa e te tiaturiraa i te mau taata atoa o te fifihia ra. Hau atu â, te faaite maira oia e nafea ia haafatata ˈtu ia ˈna. “Te haapiiraa i te parau mau o te Bibilia, e au ïa mai te faarueraa i te hoê vahi pouri roa e te tomoraa i roto i te hoê piha maramarama e te au,” ta te hoê vahine mauruuru ïa i parau. Te tutava ra anei outou i te paraparau i te parau mau no roto mai i te Parau a te Atua i te mau taime atoa?
2. E nafea te Bibilia e haamaitai ai i te oraraa o te taata?
2 E haaputapû e e taui oia i te taata o te ao atoa nei: E mana to te parau mau bibilia no te haaputapû i te mafatu e no te taui i te mau taata. (Heb. 4:12) I riro na o Rosa, te hoê vahine apî, ei vahine faaturi, te inu ava e te rave i te raau taero. “I te hoê mahana, a hepohepo roa ˈi au,” ta ˈna ïa i parau, “ua faataa mai nau hoa faaipoipo e e nehenehe te Bibilia e tauturu ia tatou ia faaafaro i to tatou mau fifi. Ua haamata aˈera vau i te haapii i te Parau a te Atua, o ta ˈu i faahiahia. I roto hoê avaˈe, ua itoitohia vau no te rave i te hoê haamataraa apî i roto i te oraraa. I teie nei e e fa ta ˈu i roto i te oraraa, aita vau e titau faahou ra i te turu a te ava aore ra a te raau taero. E no te mea ua hinaaro roa vau e riro ei hoa no Iehova, ua opua papu vau i te ora ia au i ta ˈna mau faaueraa tumu. Ahiri aita te paari mau o te Parau a te Atua, ua papu ia ˈu e ua haapohe au ia ˈu iho.”—Sal. 119:92.
3. No te aha tatou e ore ai e tapeapea i te parau i te poroi o te Bibilia ia vetahi ê?
3 Taa ê atu i te rahiraa o te mau buka i teie mahana, e haaputapû te Bibilia i te mau taata “no te mau fenua atoa, e te mau opu atoa, e te mau nunaa atoa, e te mau reo atoa.” (Apo. 7:9) E hinaaro te Atua i “te taata atoa ia ora, e ia noaa te ite [mau] i te parau mau.” (Tim. 1, 2:4; MN) No reira, eiaha roa ˈtu tatou e manaˈo e eita te hoê taata e anaanatae i te parau apî maitai no to ˈna huru oraraa. Teie râ, e paraparau anaˈe i te poroi o te Basileia i te taatoaraa, ma te faaohipa i te Bibilia i te mau taime atoa e nehenehe ai tatou.
4. E nafea tatou e nehenehe ai e faaohipa i te Bibilia ia poro tatou?
4 E huti anaˈe i te ara-maite-raa i nia i te mau Papai: E rave rahi taime to tatou no te faaohipa i te Bibilia i roto i te taviniraa. Ia pûpû tatou i te mau vea, e tamata anaˈe i te faaohipa i te irava bibilia i faahitihia i roto i te faaiteraa e pûpûhia ra. Ia faaite ratou hoê o te mau papai e pûpûhia no te avaˈe, e mea manuïa na vetahi i te taio ei omuaraa i te hoê irava bibilia maiti-maitai-hia. I te mau taime atoa e rave ai tatou i te farerei-faahou-raa, e faaite anaˈe hoê aore ra e rave rahi irava bibilia no te tauturu i te taata ia noaa riirii mai te ite mau. Ia faatere tatou i te hoê haapiiraa bibilia, e aratai anaˈe i te aparauraa i nia i te mau irava tumu. Ia ore tatou e poro i tera fare i tera fare, e tuu anaˈe i te hoê Bibilia i nia ia tatou ia tia ia tatou ia poro ma te faanaho-ore-hia.—Tim. 2, 2:15.
5. No te aha e mea tia ˈi ia tutava tatou i te faaohipa i te Bibilia i roto i ta tatou taviniraa?
5 Ia tauturu tatou ia vetahi ê ia haafaufaa i te mana puai o te Parau mau no ǒ mai i te Atua ra ma te faaohipa i te Bibilia i te mau taime tano atoa o ta tatou taviniraa!—Tes. 1, 2:13.