Ia haamaitai-rahi-hia o Iehova
E tupu te Amuraa maa ahiahi a te Fatu i te 16 no Eperera
1 Te tiai ru nei tatou i te 16 no Eperera 2003. Oia mau, i taua ahiahi ra e haamanaˈo ai tatou i to Iesu poheraa, e to tatou mau mirioni hoa i te ao nei no te faahanahana i te iˈoa o Iehova. E au ia Iehova ta tatou mau haamaitairaa atoa no te ô faahiahia roa o te hoo. Maoti te reira e ninii ai oia i te mau haamaitairaa aita e faaauraa i nia i te feia auraro atoa. Ma te aau atoa, e parau atoa tatou mai te fatu salamo e: ‘E rahi Iehova, e ia haamaitai-rahi-hia oia.’—Sal. 145:3.
2 Teie te taime no te feruriruri i te maitai o te Atua e te haamauruururaa ia ˈna no to ˈna tonoraa mai i “ta ˈna Tamaiti fanau tahi i te ao nei, ia ora tatou ia ˈna.” (Ioa. 1, 4:9, 10) A haapao ai tatou, ma te auraro i te faaueraa a Iesu, i te Amuraa maa ahiahi a te Fatu, e tapea maite tatou i roto i to tatou aau e “e hamani maitai e te aroha to Iehova . . . e te faaherehere rahi.” (Sal. 145:8) Oia mau, o te hoo te faaiteraa rahi roa ˈˈe i te aroha o Iehova i te huitaata atoa. (Ioa. 3:16) Ia feruri tatou i taua aroha ra e te hiˈoraa o te hapa ore o Iesu, e turaihia tatou ia haamaitai ia Iehova. E haamaitai tatou ia ˈna e a muri noa ˈtu no to ˈna aroha faito ore i to ˈna raveraa e ia fanaˈo tatou i te ora mure ore.—Sal. 145:1, 2.
3 E tauturu anaˈe ia vetahi ê ia haamaitai ia Iehova: No to tatou mauruuru ia Iehova no te ô hau ê o te hoo, e hinaaro tatou i te titau manihini ia vetahi ê ia haamaitai ia ˈna. Ua papai te fatu salamo ma te faauruahia e: “E parau â ratou i te manaˈoraa o to oe ra maitai rahi, e himene hua hoi i ta oe ra parau-tia.” (Sal. 145:7) I te matahiti i mahemo noa, ua rave te mau Ite no Iehova i te ao nei e hau atu i te hoê miria hora i roto i te pororaa. Mea nafea ta ratou mau tutavaraa i te haamauruururaahia? I te mau hebedoma atoa, e 5 100 tiahapa taata i te faito au noa tei bapetizohia ei taipe o ta ratou pûpûraa ia Iehova. Ma te hoê taatoaraa 15 597 746 taata i tae i te Oroa haamanaˈoraa, e 9 tiahapa mirioni o ratou e ere â i te feia poro i te parau apî maitai, e nehenehe e tiaturi i te tahi atu â maraaraa! Ei feia poro i te Basileia, te poihere nei tatou i ta tatou fanaˈoraa taa ê e faaite haere i te parau apî maitai e e aratai i te aau o te taata ia Iehova, ta ˈna Tamaiti, e te Basileia.
4 Hoê ravea maitai roa no te faaitoito ia vetahi ê ia faahanahana ia Iehova, o te titau-manihini-raa ïa ia ratou ia faatupu i te Amuraa maa ahiahi a te Fatu e o tatou. Ua papai anei outou i te tapura iˈoa o te feia atoa ta outou e hinaaro i te titau manihini e te tahi atu atoa e mea tia ia haamanaˈo atu i te mahana e te hora o te oroa? Ua horoa ˈtu anei outou i te tahi parau titau-manihini-raa? Mai te peu e aita, eiaha e haamarirau i te na reira. A tauturu ia ratou ia taa i te tumu o taua oroa ra. I te oroa, a ineine i te farii popou i te mau ratere. A manava ia ratou, a faaite o vai ratou ia vetahi ê e a haapopou atu i te haereraa mai.
5 Ma te haere i te Oroa haamanaˈoraa, e nehenehe tatou e faaitoito i te feia tae apî mai ia haere i mua i te pae varua. Noa ˈtu e mea fifi na ˈna ia haere i te vahi taata no te maˈi hepohepo uˈana i te pae feruriraa, ua haere mai te hoê piahi o te Bibilia i te Oroa haamanaˈoraa. I to ˈna uiraahia eaha to ˈna manaˈo i te putuputuraa, ua parau oia e: “E po moˈa roa teie, e ua tae mai au.” Mai reira mai, te haere ra oia i te mau putuputuraa.
6 I muri aˈe i te Oroa haamanaˈoraa: E nafea ia tauturu i te feia aau farii ia haamaitai ia Iehova? E haapao te mau matahiapo i te feia tae apî mai i te Oroa haamanaˈoraa e e ani i te tahi feia poro aravihi ia farerei ia ratou i muri rii noa ˈˈe, no te paraparau e o ratou no nia i ta ratou i haapii e i ite, e o tei tamahanahana ia ratou. E hinaaro paha te tahi pae i te hoê haapiiraa bibilia i ǒ ratou. E mea tia atoa ia titau manihini ia ratou i te mau putuputuraa a te amuiraa i te mau hebedoma atoa, ia ite atu â ratou i te Bibilia.
7 Te ravehia nei te tahi mau faanahoraa no te faaitoito i te feia atoa aita e poro pinepine ra e te feia aita e poro faahou ra ia haere tamau mai i te mau putuputuraa. Ia ani te mau matahiapo ia outou ia tauturu i te tahi taata aita e poro faahou ra ia rave faahou i te taviniraa, a farii atu. Te tuati ra te faaiteraa i tera tapitapi î i te here i to tatou mau taeae, i teie aˈoraa a te aposetolo Paulo: “Te vai nei ta tatou ravea, e hamani maitai tatou i te taata atoa, ia rahi atu râ i to te fetii faaroo.”—Gal. 6:10.
8 Ia tutava taa ê tatou paatoa i te tae mai i te Oroa haamanaˈoraa i te 16 no Eperera! Eita tatou e hinaaro i te mairi i teie oroa moˈa roa ˈˈe no te haamaitai ia Iehova. Oia mau, e haamaitai anaˈe ia Iehova no ta ˈna mau ohipa rarahi, i teie nei e a muri noa ˈtu!—Sal. 145:21.